یوم جمہوریہ کے موقع پر پس مرگ پدما وبھوشن ایوارڈ پانے والوں میں شامل ہیں اڈپی پیجاورمٹھ سوامی اور جارج فرنانڈیز
منگلورو26/جنوری (ایس او نیوز) یوم جمہوریہ کے موقع پر مرکزی حکومت کی طرف سے مختلف شعبہ ہائے زندگی میں نمایاں خدمات انجام دینے والی شخصیات کو پدما بھوشن اور پدماوبھوشن جیسے اعزازات سے نوازا جاتا ہے۔ امسال جن شخصیات کو پس مرگ پدماوبھوشن ایوارڈ سے نوازا گیا ہے اس میں پیجاور مٹھ کے سوامی اور سابق مرکزی وزیر جارج فرنانڈیز جیسی ساحلی علاقے کی دو شخصیات شامل ہیں۔خیال رہے کہ پیجاور مٹھ کے سوامی سرسوتی 29دسمبر 2019کو انتقال کرگئے تھے۔
امسال پدماوبھوشن کا اعزاز جملہ 7اہم شخصیات کو دیا گیا ہے جبکہ پدما بھوشن کے لئے 16اورپدما شری اعزاز کے لئے 118شخصیات کونامزدکیا گیا۔ اس طرح امسال یوم جمہوریہ کے موقع پر جملہ 141شخصیات کو اعزازات سے نوازا گیا ہے۔
پیجاور مٹھ سوامی کومذہب اور روحانیت کے میدان میں نمایاں خدمات کے لئے اور جارج فرناڈیز کو عوامی زندگی میں نمایاں خدمات کے لئے بعد از مرگ پدما وبھوشن ایوارڈ دیا گیاہے۔
خیال رہے کہ جنوبی کینرا سے تعلق رکھنے والے جارج فرنانڈیز نے ایک ٹریڈ یونین لیڈر کے طور پر ملک گیر شہرت حاصل کی تھی۔ انہوں نے جنتا دل میں شامل ہو کروی پی سنگھ حکومت میں وزیر برائے ریلوے کا قلمدان سنبھالا اور منگلورو کو ممبئی سے جوڑنے والے کونکن ریلوے منصوبے کو عملی جامہ پہنانے میں ان کا کلیدی کردار رہا ہے۔بعد میں انہوں نے سمتا پارٹی قائم کی، پھر بی جے پی سے ہاتھ ملایا اور اٹل بہاری واجپئی کی حکومت میں وزیر دفاع بنائے گئے تھے۔
پدماو بھوشن پانے والی شخصیات میں سابق مرکزی وزیر ارون جیٹلی، سشما سوراج، اولمپیئن باکسر میری کوم، ماریشیس کے سابق وزیر اعظم انیرود جوگاؤتھ شامل ہیں۔
جبکہ پدما بھوشن ایوارڈ پانے والوں میں سابق وزیر دفاع منوہر پاریکر، صنعت کار آنند مہیندرا، وینو شرینواس، بیڈمنٹن کھلاڑی پی وی سندھو، ناگالینڈ کے سابق وزیر اعلیٰ ایس سی جامیر، جموں و کشمیر کے سیاست داں مظفر حسین بیگ، بنگلہ دیش کے سید معظم علی کا نام شامل ہے۔
اسی طرح پدما شری کا اعزاز پانے والوں میں ضلع جنوبی کینرا کے ہاریکل حاجی ابّا اور ضلع شمالی کینرا کی تلسی گوڈاکا نام شامل ہے۔ حاجی ابّا جو ایک سنگترے بیچنے والا معمولی آمدنی والا شخص ہے جس نے اپنے گاؤں کے بچوں کی پڑھائی کا انتظام کرنے کے لئے صرف اپنی روزانہ کی کمائی سے اسکول کی شروعات ایک مسجد سے کی تھی اور اس کے بعد خود ہی اسکول تعمیر کرکے مسلسل 20سال تک اس کا انتظام چلاتا رہا۔ بعد میں یہ اسکول جنوبی کینرا ضلع پنچایت کے تحت ہائیر پرائمری اسکول میں تبدیل ہوگیا۔ حاجی ابّا کو اس سے پہلے بھی نجی اداروں کی طرف سے کئی اعزازات دئے جاچکے ہیں۔ اس کی زندگی پر مشتمل کہانی کالجوں اور یونیورسٹیوں کے نصاب میں شامل ہے۔
ضلع شمالی کینرا انکولہ تعلقہ کے ہونلّی کی رہنے والی تلسی گوڈا کو جنگلات کے تحفظ اور فروغ میں اس کی خدمات کے لئے اعزاز سے نواز گیا ہے۔پدماشری کا اعزاز پانے والوں کی فہرست میں فلم پرڈیوسر ایکتا کپور، فلم ڈائریکٹر کر ن جوہر، اداکارہ کنگنا راناوت اور گلوکار عدنان سامی کے نام بھی موجود ہیں۔