نئی دہلی ،22؍اپریل (ایس او نیوز؍ایجنسی) معروف عالم دین اور محقق  مولانا وحیدا لدین خاں صاحب   طویل علالت کے بعد  چہارشنبہ کی رات 9:45 بجے  ایک پرائیویٹ اسپتال میں انتقال گئے (انا اللہ و انا الیہ راجعون) ۔ ان کی عمر تقریباً 96 سال تھی۔  ان کی موت کی خبر سے امت مسلمہ غم میں ہے۔ چہار جانب سے اظہار تعریت کا سلسلہ جاری ہے۔ 

مولانا وحید الدین خاں، اسلامک اسکالر ، کی ولادت یکم جنوری، 1925  کو بڈھریا اعظم گڑھ، اترپردیش میں ہوئی۔ اسلامی مرکز نئی دہلی کے چیرمین، ماہ نامہ الرسالہ کے مدیر، درجنوں کتابوں کے مصنف، مقرر ار مفکر مدرستہ الا صلاح اعظم گڑھ کے فارغ التصیل تھے۔ اور 1967 سے 1974 تک الجمعیۃ ویکلی (دہلی ) کے مدیر رہ چکے ہیں ۔ آپ کی تحریریں بلاتفریق مذہب و نسل مطالعہ کی جاتی ہیں۔ مولانا مرحوم 5 زبانیں جانتے تھے ، ( اردو ، ہندی، عربی، فارسی اور انگریزی) ان زبانوں میں لکھتے اور بیان بھی دیتے تھے، ٹی وی چینلوں میں  آپ کے پروگرام نشر ہوتے رہے ہیں۔ 

مولانا وحید الدین خان، عام طور پر دانشور طبقہ میں امن  پسند مانے جاتے ہیں۔ ان کا مشن مسلمان اور دیگر مذاہب کے لوگوں میں ہم آہنگی پیدا ا کرنا ۔ اسلا م کے متعلق غیر مسلموں میں  جو غلط فہمیاں ہیں انہیں دور کرنا۔ مسلمانوں میں مدعو قوم (غیر مسلموں) کی ایذاو تکلیف پر یک طرفہ طور پر صبر اور اعراض کی تعلیم کو عام کرنا ہے جو ان کی رائے میں دعوت دین کے لیے ضروری ہے۔