بھٹکل،30؍اکتوبر (ایس او نیوز) بھٹکل تعلقہ کے جالی پنچایت، ہیبلے پنچایت اور دوسرے علاقوں میں کل محکمہ جنگلات کےافسران اور عملے نے اتی کرم  جگہوں پر تعمیرات روکنے اور قبضہ خالی کروانے کی جو مہم چلائی تھی اس کے خلاف بھٹکل محکمہ جنگلات کے دفتر کےسامنے اتی کرم داروں نے احتجاجی مظاہرہ کیا۔

خیال رہے کہ جالی پنچایت کے موسیٰ نگر اور قریبی علاقو ں کے علاوہ   ہیبلے پنچایت کے مختلف مقامات پر محکمہ جنگلات نے کارروائی کی تھی اور مکانات کی چھت ڈالنے یا دکانیں تعمیر کرنے کے کام رکوانے کے علاوہ کمپاؤنڈ کی دیواریں وغیرہ توڑ دی گئی تھیں۔ کئی جگہوں پر اتی کرم دار اور محکمہ جنگلات کے عملے میں بحث و تکرار بھی ہوئی اور قبضہ داروں نے توڑ پھوڑ کی کارروائی میں رکاوٹیں پیدا کیں ، لیکن محکمہ جنگلات کے افسران نے کسی بھی بات کی پروا کیے بغیر اپنی کارروائی پوری کرلی۔ 

جنگلاتی زمین پر قبضہ کرکے رہائش پزیر افراد کا کہنا ہے کہ ہم لوگ 20، 30 سال سے ان مقامات پر رہتے آئے ہیں۔ ہم پرانے قبضہ دار ہیں ۔ اب اچانک محکمہ جنگلات کے افسران ہم کو یہاں سے ہٹانے لگیں گے تو پھر ہم لوگ کہاں جائیں۔ دوسری طرف رینج فاریسٹ آفیسر سویتا دیواڈیگا نے وضاحت کرتے ہوئے کہا کہ ہم لوگوں نے کسی بھی پرانے قبضے کو نہیں ہٹایا ہے ۔ صرف نئی تعمیرات بند کروائی ہیں۔ لوگ نئی تعمیر کرتے رہیں گے تو ہم خاموش تماشائی بن کر بیٹھ نہیں سکتے ۔ اگر ہم کارروائی نہیں کریں گے تو ہمارے اعلیٰ افسران ہم سے جواب طلب کرتے ہیں۔ لوگوں کویہ بات سمجھنی چاہیے۔

جب محکمہ جنگلات کے دفتر کےسامنےاحتجاجی  ہجوم بڑھ گیا اور نعرے بازی ہونے لگی تو ٹاؤن پولیس  اسٹیشن کے سب انسپکٹر بھرت اپنے عملے کے ساتھ وہاں پہنچ گئے اور مشتعل مظاہرین کو منتشر کردیا۔