ایڈی یورپا نے اس سال بھی بجٹ میں بھاری تخفیف کا اشارہ دیا
بنگلورو،24؍جنوری(ایس او نیوز) وزیر اعلیٰ بی ایس ایڈی یورپا نے کہا ہے کہ کورونا وائرس کے سبب رواں سال بھی بجٹ میں غیر معمولی تخفیف ہو سکتی ہے۔
انہوں نے کہا ہے کہ ترقیاتی کاموں اور فلاحی اسکیموں کے لئے مخصوص فنڈس کا بہت بڑا حصہ کورونا وائرس سے جڑے کاموں پر صرف ہو گیا ہے، اس لئے بجٹ کے تحت سال 2021-22کے دوران مختص کی جانے والی رقم میں اور بھی کمی آنے کا خدشہ ہے۔ انہوں نے کہا کہ کورونا وائرس کے سبب رواں سال سرکاری آمدنی بری طرح متاثر ہوئی ہے۔ سال بھر کے دوران حکومت کو مالی وسائل یکجا کرنے میں غیر معمولی دشواریوں کا سامنا کرنا پڑا ہے۔ اس لئے گزشتہ بار کی طرح اس بار بھی بجٹ کے حجم کو محدود رکھنے پر سنجیدگی سے غو رکیا جا رہا ہے۔
وزیر اعلیٰ نے کہا کہ حالانکہ گزشتہ سال انہوں نے 2.37لاکھ کروڑ روپیوں کا بجٹ پیش کیا تھا،لیکن اس میں سے زیادہ تر رقم کورونا وائرس کی صورتحال سے نپٹنے پر صرف ہو گئی۔ انہوں نے کہا کہ سال بھر کے دوران ریاست میں کہیں بھی کورونا سے نپٹنے کے لئے فنڈس کی فراہمی میں کوتاہی ہونے نہیں دی گئی اوراس کا راست اثر ریاست کی مالی حالت پر بھی پڑا ہے۔ ان کی طرف سے بجٹ پیش کرنے کی تیاریوں کے طورپر مختلف محکموں سے جو تفصیلات منگوائی گئی ہیں ان سے صاف ظاہر ہو رہا ہے کہ رواں سال ریاست کو آمدنی کے جن وسائل سے توقع تھی وہ شاید پوری نہ ہو سکے۔