مرڈیشور:ہندو مسلم خواتین کا آپسی میل جول بہتر معاشرے کی تشکیل میں معاون :ہیومن ویلفئیر ٹرسٹ پروگرام میں جئے شری موگیر
بھٹکل :16/جولائی (ایس اؤ نیوز) مسلم اور ہندو خواتین کا آپسی میل جول کئی غلط فہمیوں کو دور کرتاہے ، اس طرح کے کئی خود کار سنگھ میں یہ ایک ہوکر کام کررہی ہیں، البتہ مسلمانوں کے متعلق بہت ساری غلط فہمیاں پھیلائی گئی ہیں ہماری ہندو خواتین بھی اس سے متاثر نظر آتی ہیں، ضرورت ہے کہ ہم اپنا تعلقات میں مضبوطی لاتے ہوئے اپنے خیالات کا تبادلہ کریں ، سب کے ساتھ مل جل کر ایک صحت مند معاشرہ تعمیر کرنے کا اترکنڑا ضلع پنچایت کی صدر جئے شری موگیر نے خیال ظاہر کیا۔
وہ یہاں مرڈیشور میں ہیومن ویلفئیر ٹرسٹ کی جانب سے مستحقین میں کمبل تقسیم پروگرام میں مہمان خصوصی کی حیثیت سے خطاب کررہی تھیں۔
پروگرام کی صدارت کرتے ہوئے بھٹکل کے معروف صحافی محمد رضا مانوی نے کہاکہ آج ملک کو ہندو مسلم کے نام پر تقسیم کرتے ہوئے ملک کو کمزور کرنےکی منصوبہ بند سازشیں جاری ہیں۔ ہمیں آپسی بھائی چارہ ، انسانیت اور خیر سگالی کے منصوبہ جات کی تشکیل کرتے ہوئے مقابلہ کرنے کی ضرورت ہے۔ انہوں نے اسلام کا کنڑا میں مختصر تعارف پیش کرتے ہوئے کہاکہ صرف ٹوپی، جبہ ہی اسلام نہیں ہے، بلکہ انسانوں کی خدمت، سماجی فکر بھی اسلام میں شامل ہے، اسلام کہیں بھی دھرم، ذات پات کے تعصبات کے لئے جگہ نہیں دی ہے بلکہ تمام انسانوں کو بھائی بھائی کہتے ہوئے سب کی خدمت کو دینی فرض بتایا ہے۔ نیناد ادارے کے امیش نائک منڈلی نے خطاب کرتے ہوئے کہاکہ روشنی کی کرنیں جہاں کہیں سے بھی حاصل ہو وہ اندھیرے کو دور کرتی ہیں، سماجی خدمت سے اطمینان حاصل ہونے کی بات کہی۔ جماعت اسلامی ہند اترکنڑا ضلع کے ناظم محمد طلحہ سدی باپا نے قرآن میں مسلمانوں کے متعلق کیا کچھ فرائض بتائے گئے ہیں اس پر روشنی ڈالی۔ ضلع پنچایت ممبر سندھو بھاسکر نائک، ویلفئیر ٹرسٹ کی کرافٹ استانی نینا نائک نے بھی اپنے تاثرات کا اظہار کیا۔ ٹرسٹ کے صدر ڈاکٹر امین الدین گوڈا نے افتتاحی کلمات پیش کرتے ہوئے استقبال کیا تو استاد امتیاز ملا نے نظامت کی۔ ڈائس پر تنویر الاسلام تعلیمی ادارے کے زبیر منا ، گوپال نائک وغیرہ موجود تھے۔