منگلورو: 13؍ستمبر(ایس اؤ نیوز) سابق مرکزی وزیر، سنئیر کانگریس لیڈراور راجیہ سبھا کے رکن آسکر فرنانڈیز طویل علالت کے بعد منگلورو میں انتقال کرگئے۔  80سالہ آسکر فرنانڈیزطویل مدت سے منگلورو کےایک اسپتال میں زیر علاج تھا۔ پیر کو انہوں نے آخری سانس لی۔

موصولہ اطلاعات کے مطابق رواں سال کے جولائی میں  یوگا کرتےہوئے انہیں چوٹ لگنے کے بعد ان کی طبیعت مسلسل خراب رہنے لگی تھی،وہ  آئی سی یو میں داخل تھے جہاں ان کے دماغ کا آپریشن ہونے والاتھا۔ ان کے انتقال پر وزیر اعظم نریندر مودی، راہول گاندھی ، پریانکا گاندھی اور کانگریس کے سرکردہ لیڈران، کرناٹک کے وزیر اعلیٰ بسوراج بومائی سمیت بھٹکل کے سیاسی و سماجی اور تعلیمی اداروں کے ذمہ داران، قائدین سمیت کئی لوگوں نے گہرے رنج و غم کا اظہار کیاہے۔

آسکر فرنانڈیز یوپی اے کی مرکزی حکومت میں روڈ ٹرانسپورٹ کے وزیر تھے۔ سابق وزیر اعظم راجیوگاندھی کے پارلیمنٹری سکریٹری کے طورپر بھی انہوں نےخدمات انجام دی تھیں۔ 1980میں وہ آڈپی لوک سبھا حلقہ سے کانگریس کے ٹکٹ پر منتخب ہوئے۔ اسی طرح 1984،1989،1991،اور 1996میں دوبارہ منتخب ہوئے۔ 1998میں انہیں کانگریس نے راجیہ سبھا کا رکن نامزد کیا تھا تب سے وہ راجیہ سبھا کےرکن تھے۔ آسکر فرنانڈیز کانگریس کے وفادار سپاہی ، گاندھی خاندان کے قریبی مانے جاتے تھے۔