بھٹکل بینگرے میں منعقدہ دو روزہ انٹر ڈسٹرکٹ لیول ٹینس بال کرکٹ ٹورنامنٹ میں آرگنائزر جین جٹگیشور نے ماری بازی، صرف دو دن میں ٹورنامنٹ ختم !
بھٹکل 3 جنوری (ایس او نیوز) تعلقہ کے بینگرے گونجی ہیتلو میدان میں منعقدہ دو روزہ ٹینس بال انٹرڈسٹرکٹ کرکٹ ٹورنامنٹ میں آرگنائزر ٹیم بھٹکل بینگرے کی جین جٹگیشور نے فائنل مقابلہ میں بھٹکل کی ہی این جے بوائز ٹیم کو شکست دیتے ہوئے جٹگیشور ٹرافی جیت لی۔
چھ اوروں والے اس ٹورنامنٹ میں اُترکنڑا اور ہاویری سمیت مینگلور کی ٹیم بشمول 35 ٹیموں نے حصہ لیا تھا۔ یکم جنوری کو سابق بھٹکل ایم ایل اے منکال وئیدیا کے ہاتھوں ٹورنامنٹ کا افتتاح ہوا ، 2 جنوری کو کامیابی کے ساتھ ٹورنامنٹ اختتام کو پہنچا۔ تعلقہ پنچایت کے سابق صدر وی جے بھیرومنے اور تعلقہ پنچایت کے سابق ممبر وشنو دیواڑیگا اختتامی تقریب میں موجود تھے۔
اول آنے والی ٹیم جین جٹگیشور کو پہلا انعام 11,111 روپیہ مع ٹرافی،این جے بوائز کو دوسرا انعام 7,777 روپیہ مع ٹرافی اور تیسرا انعام بھٹکل مُنڈلی کی این کے اسٹرائیکر کو 3,333 روپیہ مع ٹرافی سے نوازا گیا۔
ٹورنامنٹ میں این جے بوائز کے رگھو کو مین آف دی سیریز کے ایوارڈ سے نوازا گیا، جٹگیشور کے وسنت کو بیسٹ بیٹسمین، جٹگیشور کے پون نائک کو بیسٹ باولر، جٹگیشور کے شیکھر کو مین آف دی میچ اور جٹگیشور کے ہی گنیش کو بہترین فیلڈر کے اعزاز سے نوازا گیا۔
بتاتے چلیں کہ بھٹکل میں ایک طرف ایک ایک ماہ تک کرکٹ ٹورنامنٹ چلتا ہے تو وہیں دوسری طرف 35 ٹیموں کے ساتھ دو دن میں بھی ٹورنامنٹ اختتام کو پہنچتا ہے۔ بینگرے میں کھیلا گیا یہ ٹورنامنٹ اس کی ایک تازہ مثال ہے۔