بنگلورو، 9؍ نومبر (ایس او نیوز) ریاستی محکمہ صحت نے ایک نوٹی فکیشن جاری کرتے ہوئے بتایاہے کہ ایمرجنسی کے دوران سرکاری اسپتال آنے والے مریضوں کو بغیرکسی دستاویزات کے پہلے علاج کیا جائے۔ ٹمکور کے سرکاری اسپتال میں تائی کارڈ نہ ہونے کی وجہ سے علاج کرنے سے انکارکے بعد گھر میں زچگی سے ماں اورجڑواں بچوں کی ہلاکت کے بعد محکمہ صحت نے یہ احکامات جاری کئے ہیں۔

نوٹی فکیشن میں ہدایت دی گئی ہے کہ ایمرجنسی حالات میں مریض کو علاج کی ضرورت ہوتی ہے، اس لئے ڈاکٹر نرس اور دیگر عملہ فوری طور پر کارروائی کرے اورطبی خدمات کے دوران مریض کی قومیت، ذات پات اور اقتصادی حالت کا جائزہ نہ لیں۔ محکمہ نے ہدایت دی کہ زچگی کے لئے داخل خواتین کو تائی کارڈ، آدھار کارڈ، راشن کارڈ کے بغیر ہی علاج کیا جائے۔ دستاویزات پیش کرنے کا مطالبہ نہ کیا جائے، اگر کوئی دستاویزات پیش کرنے دباؤ ڈالیں تو ان کے خلاف فوجداری مقدمہ درج کیا جائے گا۔

یاد رہے کہ ٹمکور ضلع اسپتال میں ایک حاملہ خاتون کو ایمرجنسی کے دوران تائی کارڈ ودیگر دستاویزات نہ ہونے پر علاج سے انکارکیا گیا، جس کی وجہ سے انہیں گھر واپس لوٹنا پڑا اور گھر میں زچگی کے دوران ماں اور جڑواں بچے ہلاک ہوگئے۔ اس واقعہ کے خلاف مختلف تنظیموں نے آواز اٹھائی اور خاطی اسپتال کے عملہ کے خلاف کارروائی کرنے کا مطالبہ کیا تھا۔