جدہ،26/اپریل (ایس او نیوز/ایجنسی) سوڈان میں خانہ جنگی کے باعث حالات انتہائی خراب ہیں۔ ایسے میں آپریشن کاویری کے تحت ہندوستانیوں کو وہاں سے بحفاظت نکالا جا رہا ہے۔ بدھ کے روز بحران زدہ سوڈان سے روانہ ہونے والے ہندوستانی فضائیہ کے دوسرے سی-130جے طیارے پر سوار 135 ہندوستانیوں کا تیسرا دستہ سعودی عرب کے شہر جدہ پہنچ گیا۔

قبل ازیں وزیر مملکت برائے امور خارجہ وی مرلیدھرن نے دوسرے دستے میں 148 ہندوستانیوں کو بحفاظت باہر نکالا۔ وہیں، بحری جہاز آئی این ایس سومیدھا بھی 278 مسافروں کے ساتھ جدہ بندرگاہ پہنچ گیا۔ امید کی جا رہی ہے کہ تمام ہندوستانیوں کو سوڈان سے بحفاظت نکال لیا جائے گا۔

سوڈان سے تیسرا دستہ سعودی پہنچنے پر وزارت خارجہ نے ٹوئٹ کیا ’’آپریشن کاویری شباب پر ہے۔ دوسری IAF C-130J پرواز پورٹ سوڈان سے جدہ کے لیے روانہ ہوئی، جس میں مزید 135 مسافر سوار تھے۔ یہ آپریشن کاویری کے تحت ہے، انخلاء کا تیسرا دستہ ہے۔‘‘

منگل کو مرکزی وزیر مملکت برائے امور خارجہ نے جدہ کے انٹرنیشنل انڈین اسکول میں ٹرانزٹ سہولت کا معائنہ کیا، جہاں سوڈان سے نکالے گئے ہندوستانیوں کو ہندوستان آنے سے پہلے رکھا جا رہا ہے۔ اس کے بعد ایم او ایس نے ٹوئٹ کیا ’’جدہ میں اس جگہ کا معائنہ کیا جہاں سوڈان سے نکالے گئے ہندوستانیوں کو ہندوستان جانے سے پہلے رکھا جائے گا۔ اس میں آرام دہ گدے، تازہ کھانا، بیت الخلاء، طبی سہولیات، وائی فائی وغیرہ جیسی مکمل سہولیات موجود ہیں۔‘‘

دارالحکومت خرطوم میں سوڈانی فوج اور نیم فوجی گروپوں کے درمیان لڑائی تیز ہونے کے بعد وزیر خارجہ ایس جے شنکر نے پیر کو بتایا کہ جنگ زدہ سوڈان سے اپنے شہریوں کو نکالنے کے لیے 'آپریشن کاویری' جاری ہے اور تقریباً 500 ہندوستانی پورٹ سوڈان پہنچ چکے ہیں۔

ہندوستان نے جنگ زدہ ملک سے پھنسے ہوئے ہندوستانیوں کو واپس لانے کے لیے ’آپریشن کاویری‘ شروع کیا۔ ہندوستانی بحریہ کا آئی این ایس تیغ منگل کو سوڈان میں پھنسے ہندوستانیوں کو نکالنے کے لئے 'آپریشن کاویری' میں شامل ہوا۔ وزارت خارجہ کے ایک سینئر افسر نے بتایا کہ یہ فریگیٹ منگل کو پورٹ سوڈان پہنچا جس میں اضافی افسران اور پھنسے ہوئے ہندوستانیوں کے لیے ضروری امدادی سامان تھا۔

وزارت خارجہ کے سرکاری ترجمان ارندم باگچی نے منگل کو ٹوئٹ کیا ’’آئی اے این ایس تیغ آپریشن کاویری میں شامل ہوا۔ اضافی افسران اور پھنسے ہوئے ہندوستانیوں کے لیے ضروری امدادی سامان کے ساتھ پورٹ سوڈان پہنچا۔" باغچی نے کہا، "پورٹ سوڈان میں سفارت خانے کا کیمپ دفتر کی طرف سے جاری انخلاء کی کوششوں کو بڑھانے میں مدد کرے گا۔"

خیال رہے کہ سوڈان میں متحارب گروپوں نے پیر کو امریکہ اور سعودی عرب کی ثالثی کے بعد 72 گھنٹے کی جنگ بندی پر اتفاق کیا تھا، لہذا کئی ممالک اپنے شہریوں کو نکالنے میں مصروف ہیں۔