دیوالی تہوار کے موقع پر بھٹکل میں تیز ہوئی ہے آن لائن خریداری۔ مقامی دکاندارو ں کا متاثر ہونا یقینی !
بھٹکل،18؍نومبر (ایس او نیوز) دیوالی تہوار کے موقع پر بازاروں میں دکاندار اپنی دکانیں اس امید میں سجائے بیٹھتے ہیں کہ اس موسم میں خوب کمائی کریں گے اور مندی کے دنوں کا خسارہ پورا کرلیں گے۔ امسال تو ویسے بھی پچھلے سات آٹھ مہینوں سے کورونا وباء اور لاک ڈاؤن نے ہر جگہ کمر توڑ رکھی ہے تو ظاہر ہے کہ دیوالی کے تہوار سے ان دکانداروں کی توقعات ہزار گنّا بڑھ گئی تھیں۔
لیکن مقامی بازاروں میں تجارتی سرگرمیاں چلانے والے دکانداروں کوآن لائن کاروبار چلانے والی نامور کمپنیوں سے ایک بڑا جھٹکا لگا ہے ، کیونکہ ان کمپنیوں نے خریداروں کے لئے رعایتی پیش کش یا آفرس کی بھرمار کردی ہے ، جس کے بعد ہرجگہ مقامی بازار سے زیادہ آن لائن مارکیٹ پر گاہکوں کی بھیڑ دکھائی دے رہی ہے۔کیونکہ آج کے دور میں موبائل فون اور انٹرنیٹ سروس نے بڑے شہر اورچھوٹے گاؤں کا فرق پوری طرح مٹا دیا ہے۔مرد ، خواتین ، بوڑھے ، بچے سب کے سب آن لائن خرید وفروخت میں دلچسپی لینے لگے ہیں ۔ اور گھر بیٹھے ہی اپنی ضرورت یا پسند کی اشیاء حاصل کرنے لگے ہیں۔ چاہے وہ الیکٹرک سامان ہو یا الیکٹرانک، کپڑے اور ملبوسات ہوں یا دوائیاں اور ذاتی ضرورت کی چیزیں ، سب کچھ ایک انگلی کی کلک پر جب دستیاب ہو اور پھر پسند نہ آنے یا اس کی کوالٹی میں کوئی فرق ہونے کی صورت میں واپس لوٹانے کی پوری آزادی ہواور قیمتیں بھی اکثر و بیشتر نہایت کفایتی ہوں تو پھر کون آن لائن خریداری کو ترجیح نہیں دے گا؟
اگر ہم بھٹکل کی صورتحال کا جائزہ لیں تو یہاں بھی کچھ ایسی ہی کیفیت دیکھنے کو مل رہی ہے۔ ان دنوں یہاں پر ’امیزان، فلپ کارٹ،پے ٹی ایم، مینترا، ای کام ایکسپریس،بلیو ڈارٹ، ایکسپریس بِز،جیسی آن لائن کمپنیوں کی ڈیلیوری دینے والی دکانیں اور دفاتر ایک کے بعد ایک کھلتے جارہے ہیں۔معلو م ہوا ہے کہ اس مرتبہ دیوالی تہوار کے موسم میں بڑی آن لائن کمپنیوں سے خریدے گئے مال کی ڈیلیوری دینے والے ایجنٹس اتنے مصروف ہوگئے ہیں کہ انہیں اپنے آرڈر کا مال خود اپنے ڈیلیوری بوائز کے ذریعےوقت پر سپلائی کرنے کی فرصت نہ رہنے کی وجہ سے انہوں نے دوسری کمپنیوں کے لڑکوں کو بھی یہ ذمہ داریاں تقسیم کی ہیں۔
اس وقت بھٹکل میں آن لائن خریداری کی رفتار اور مقدار کے تعلق سے خود ایک آن لائن سپلائر نے بتایا کہ ’’ امسال دیوالی کے موسم میں آن لائن خریداری اور آرڈر کی فراہمی میں چار گنّا اضافہ ہوا ہے۔عام دنوں میں ہم لوگ 500کے قریب پارسل گھر گھر پہنچایا کرتے تھے، لیکن دیوالی کے دنوں میں اس وقت بھٹکل میں روزانہ 2000سے زیادہ پارسل سپلائی کیے جارہے ہیں۔اور ہمیں لگتاہے کہ آنے والے دنوں میں آن لائن خریداری اور ڈیلیوری میں مزید اضافہ ہونے والا ہے ۔‘‘
آن لائن خریداری میں اس بے پناہ اضافے کو دیکھتے ہوئے کہا جاسکتا ہے کہ بھٹکل میں لاکھوں کا سرمایہ لگاکر شہر میں کاروبار شروع کرنے والے نئے تاجر اور ایک زمانے سے کاروباری دنیا میں جمے ہوئے مقامی دکانداروں کے لئے حالات کچھ اور سخت ہونے والے ہیں۔کیونکہ نئی نسل کے اندر انٹرنیٹ کے ذریعے آن لائن خریداری کا رجحان تو کسی صورت کم ہونے والا نہیں ہے۔