بھٹکل انجمن ڈگری کالج میں آن لائن کلاسس کا آج ہوا افتتاح؛ انجمن کے تعلیمی اداروں میں دو تین ماہ سے جاری ہے آن لائن کلاسس
بھٹکل 2/ستمبر (ایس او نیوز) کورونا لاک ڈاون کے چلتے جس طرح ملک بھر میں تعلیمی ادارے بند ہیں، بچوں کی تعلیم بری طرح متاثر ہورہی ہے۔ لاک ڈاون 4.0 کا اعلان ہوتے ہی اب انجمن ڈگری کالج میں آن لائن کلاسس شروع کئے گئے ہیں ، جس کا افتتاح آج بدھ کو انجمن کے صدر ایڈوکیٹ قاضیا مزمل صاحب کے ہاتھوں ہوا۔
افتتاحی تقریب میں خطاب کرتے ہوئے جناب مزمل قاضیا نے بتایا کہ آن لائن کلاسس دراصل روایتی کلاس روم کےذریعے تعلیم دینے جیسا متبادل نظام نہیں ہے، آن لائن کلاسس صرف تعلیمی سرگرمیوں کو جاری رکھنے کی ایک کوشش ہے کہ بچوں کو کلاس روم میں نہ سہی، کم ازکم آن لائن کلاسس کے ذریعے جتنا ممکن ہے، انہیں تعلیمی میدان میں آگے بڑھایا جاسکے۔ انہوں نے کہا کہ جن بچوں کے پاس آن لائن کلاسس میں شریک ہونے کی سہولت نہیں ہے، اُن کے لئے آن لائن کلاسس کی وڈیو ریکارڈنگ یو ٹیوب یا اس جیسے پلیٹ فارم پر شئیر کئے جائیں گے تاکہ طلبا ان سے فائدہ اُٹھا سکیں۔
انجمن کے جنرل سکریٹری جناب صدیق اسماعیل نے اس موقع پر اخبارنویسوں کو بتایا کہ انجمن کے تعلیمی اداروں بالخصوص گرلز ہائی اسکول اور گرلز کالج سمیت پرائمری اسکولوں میں گذشتہ دو تین ماہ سے آن لائن کلاسس جاری ہیں اور بچے بڑھ چڑھ کر آن لائن کلاسس سے استفادہ کررہے ہیں۔
آج کی افتتاحی تقریب میں انجمن کے نائب صدر صادق پلور، ایڈیشنل سکریٹری اسحاق شاہ بندری، ہاشم ایس جے، عبدالعظیم ایس ایم، پرنسپل مشتاق شیخ اور کئی دیگر اسٹاف و ذمہ داران موجود تھے۔
خیال رہے کہ لاک ڈاون میں چھوٹ دینے کے بعد سرکار کی طرف سے یکم ستمبر کو آن لائن کلاسس چلانے کی اجازت دی گئی ہے، جبکہ یکم اکتوبر سے پہلےکی طرح بچوں کو کلاسس میںہی تعلیم فراہم کرنے کی بات کہی گئی ہے۔