منگلورو میں بجلی کا جھٹکا لگنے سے ایک 26سالہ نوجوان ہلاک۔ دوسرا شدید زخمی
منگلورو25/اکتوبر (ایس او نیوز)تھوکٹو کے علاقے میں کام کے دوران بجلی کا جھٹکا لگنے سے ایک 26سالہ نوجوان ہلاک ہوگیا جب کہ ا س کے ساتھی کو شدید زخمی حالت میں علاج کے لئے اسپتال میں داخل کیا گیا ہے۔
اطلاع کے مطابق ہلاک ہونے والے نوجوان کی شناخت ولسن فرنانڈیز کی حیثیت سے کی گئی ہے جو اپنے بھائی نیلسن فرنانڈیز کے ساتھ مل کر ’نیلسن آٹو الیکٹرک ورکس‘ کے نام سے ایک دکان چلایا کرتاتھا۔ آج صبح اپنی دکان کے الیکٹرک بورڈ کودرست کرنے کے لئے ولسن ایک او رملازم کے ساتھ دکان کی چھت پر چڑھا تھا۔ اس دوران بجلی کا جھٹکا لگنے سے وہ دونوں زمین پر گر گئے۔فوری طور پر دونوں کو اسپتال میں منتقل کرنے کی کوشش کی گئی، مگر ولسن نے دوران سفر ہی راستے میں دم توڑ دیا۔ اس کے دوسرے ساتھی کے سر میں چوٹ آئی ہے اور فی الحال سنگین حالت میں زیر علاج ہے۔
