بھٹکل یکم اپریل (ایس او نیوز) تعلیمی بیداری پیدا ہونے کے ساتھ ساتھ بھٹکل کے نوجوانوں میں قوم و ملت کی خدمت کا جذبہ بھی پیدا ہورہا ہے۔ خوش آئند بات یہ ہے کہ ملک کے حالات اور مسلمانوں کے بڑھتے مسائل کو دیکھتے ہوئے نوجوانوں میں اس بات کی بھی بیداری پیدا ہورہی ہے کہ اُن مسائل کے حل کے لئے کس طرح مثبت اقدامات کئے جائیں۔ اسی طرح کاقومی و ملی جذبہ لے کر بھٹکل کے نوجوان قانون میں مہارت حاصل کررہے ہیں۔
بھٹکل کے معروف سنئیر وکیل جناب ایڈوکیٹ مزمل قاضیا کے فرزند نقیب احمد قاضیا ایک طرف بنگلور میں سائبر کرائم کے کیسس ہینڈل کرنے میں ماہر ہیں تو وہیں ایڈوکیٹ نہزان ائیکری، ایڈوکیٹ اسماعیل مُنیب مصباح، ایڈوکیٹ آفاق کولا، تیمور حُسین گوائی، محمد دانش وغیرہ بنگلور میں مختلف کیسس کو ہینڈل کرنے میں مہارت رکھتے ہیں، ان کے ساتھ ساتھ مینگلور میں سمیر قاسمجی اور بھٹکل میں عمران لنکا سمیت دیگر نوجوان وُکلاء بھی اپنی خدمات انجام دے رہے ہیں۔ ان میں ایک اور نام اب عبدالحنان فاروقی کا جُڑ گیا ہے۔
بھٹکل کے سماجی کارکن اور سابق کونسلر جناب زین العابدین فاروقی کے فرزند عبدالحنان اب بنگلور ہائی کورٹ کے وکیل بن گئے ہیں جنہوں نے حال ہی میں ایل ایل بی کی ڈگری حاصل کی تھی۔
ابتدائی تعلیم بھٹکل کے آنند اشرم کانوینٹ اسکول میں مکمل کرنے کے بعد عبدالحنان نے انجمن آرٹس سائنس اینڈ کامرس کالج بھٹکل سے کامرس میں گریجویٹ کیا جس کے بعد انہوں نے بنگلور سے وکالت کی ڈگری لی۔
ایڈوکیٹ عبدالحنان نے بتایا کہ ہمارے نوجوانوں کو ہرمیدان میں آگے بڑھنا چاہئے اور قوم و ملت کی خدمت کرنی چاہئے، ہماری کمیونٹی کے لوگ دیگر میدانوں میں آگے بڑھ رہے ہیں، مگر قانون اور عدلیہ میں ہماری نمائندگی بے حد کم ہے، جسے دیکھتے ہوئے میں نے اس فیلڈ کو اپنانے کا فیصلہ کیا اور ایل ایل بی کی ڈگری حاصل کی۔ عبدالحنان نے اپنے تاثرات پیش کرتے ہوئے قوم و ملت کی ہرممکن طریقہ پر خدمت کرنے کا جذبہ ظاہر کیا۔