بھٹکل 29/جولائی (ایس او نیوز) یہاں سے قریب 30 کلو میٹر دور ہوناور تعلقہ کے کاسرکوڈ نیشنل ہائی وے  پر پیش آئے ایک سڑک حادثہ میں   ایک شخص اسپتال لے جانے کے دوران ہلاک ہوگیا جس کی شناخت  کاسرکوڈ کے رہنے والے ہنومنتا چندرو گوڈا (47) کی حیثیت سے کی گئی ہے۔

منکی کے سماجی کارکن ذاکر کٹنگری  نے بتایا کہ حادثہ  آج پیر صبح قریب 12 بجے اُس وقت پیش آیا جب  ہنومنتا  ہوسپٹن کراس کے قریب نیشنل ہائی وے پر  اپنی کار کو پارک کرکے قریبی دکان سے پوجا کرنے کی کچھ چیزیں خرید رہا تھا کہ اچانک ایک لاری کسی سواری کو اوورٹیک کرنے کے زعم میں  ہنومنتا پر چڑھ گئی۔ ہنو منتا کو فوری طور پر شدید زخمی حالت میں  اسپتال لے جایا  جارہا تھا  مگر اُس نے راستے میں ہی   دم توڑ دیا۔

بتایا جارہا ہے کہ  ہنومنتا پوجا کرنے کی غرض سے  کار کو سڑک کنارے پارک کرکے متعلقہ دکان سے پوجا کی  چیزیں خرید رہا تھا، جس کے دوران یہ حادثہ پیش آیا۔

منکی سرکاری  اسپتال میں نعش کا پوسٹ مارٹم کرکے نعش کو اُس کے گھروالوں کے حوالے کیا گیا۔

منکی پولس تھانہ میں معاملہ درج کیا گیا ہے اور پولس مزید چھان بین کررہی ہے۔