جے شری رام نہیں بولنے پر مسلم نوجوان کی جم کر پٹائی ، معاملہ درج
اورنگ آباد،21؍جولائی (ایس او نیوز؍ایجنسی) مہاراشٹر کے اورنگ آباد میں جے شری رام نہیں بولنے پر کچھ لوگوں نے ایک مسلم نوجوان کی مبینہ طور پر جم کر پٹائی کردی ۔ مقامی پولیس نے بتایا کہ ہوٹل میں کام کرنے والا ملازم عمران اسماعیل پٹیل جمعہ کی صبح اپنے گھر لوٹ رہا تھا ، اسی دوران 10 لوگوں نے اس کی بائیک کو روک لیا ، اس کی چابی چھین لی اور اس کو جے شری رام بولنے کیلئے کہا ۔
پولیس افسر کے مطابق گرفتار کیا گیا شخص گنیش ونود سونونے ( 21) ایک رکشہ پولر ہے اور بھرت نگر علاقہ کا رہنے والا ہے ۔ ہوٹل کے ملازم پٹیل نے اپنی شکایت میں کہا تھا کہ تقریبا دس لوگوں کے ایک گروپ نے اس کو بوگم پورا علاقہ میں ہڈکو کارنر کے نزدیک روکا ، جب وہ جمعہ کی علی الصبح موٹر سائیکل سے گھر لوٹ رہا تھا ۔
انہوں نے دعوی کیا کہ ان لوگوں نے ان کی بائیک کی چابی چھین لی ، ان کے ساتھ مار پیٹ کی اور انہیں جے شری رام کہنے کیلئے مجبور کیا ۔ پٹیل نے پولیس کو بتایا کہ گنیش نام کے شخص ( گرفتار شخص نہیں ) اور پاس میں رہنے والے لوگ ہنگامہ سن کر ان کی جان بچانے کیلئے وہاں پہنچ گئے ۔
آئی پی سی کی دفعہ 135 اے ( مذہب کے نام پر مختلف گروپس کے درمیان دشمنی کو بڑھانا ) اور 144 کے تحت معاملہ درج کیا گیا ہے ۔ خیال رہے کہ اس طرح کے واقعات حال ہی میں مہاراشٹر کے تھانہ سمیت ملک کے کئی مقامات پر پیش آچکے ہیں ۔