کیا بھٹکل میں سرکل پر انڈرپاس، انفال سوپر مارکیٹ تک فلائی اوور اور تنگنگنڈی کراس تک سرویس روڈ تعمیر ہوگا؟
بھٹکل :24؍جنوری (ایس اؤ نیوز) بھٹکل شمس الدین سرکل پر انڈر پاس ہوگا، جبکہ انفال سوپر مارکٹ تک فلائی اوور کی تعمیر ہوگی اسی طرح سرکل سے تینگنگونڈی کراس تک نیشنل ہائی وے کے دونوں طرف سروس روڈ ہوگا۔ اس بات کی جانکاری بھٹکل رکن اسمبلی سنیل نائک نے دی ہے۔ پریس کانفرنس میں گفتگو کرتے ہوئے انہوں نے بتایا کہ یہ معلومات انہوں نے نیشنل ہائی وے اتھارٹی کے افسران سے حاصل کی ہے۔ نیشنل ہائی وے کی توسیع کے تعلق سے مزید جانکاری دیتے ہوئے سنیل نائک نے بتایا کہ شرالی میں بھی شاہراہ کی توسیع 35 میٹر سے بڑھا کر 45میٹر کی گئی ہے۔ کائی کنی کے قریب انڈرپاس کی تعمیر کے متعلق پوچھےجانے پر انہوں نے بتایاکہ 100میٹر کی دوری پر انڈر پاس تعمیر کرنےکی پیش کش ڈی سی کو دی گئی ہے امید ہے کہ وہ منظور ہوجائے گی۔
سنیل نائک نے دعویٰ کیا کہ بھٹکل ہوناور ودھان سبھا حلقہ میں ترقیاتی کام تیزی سےہورہےہیں، اسی کے ایک حصہ کے طورپر 25جنوری کو بھٹکل کے منی ودھان سبھا کا افتتاح ہورہاہے۔ منی ودھان سبھا کے افتتاح سے عوام کو الگ الگ دفاترکے چکر لگانے سے نجات حاصل ہوگی ۔ بھٹکل اے سی دفتر، تحصیلدار دفتر، پی ڈبلیو ڈی سمیت تمام دفاتر ایک ہی عمارت میں موجود ہوں گے اور سبھی کام ایک ہی عمارت میں انجام دئے جائیں گے۔ آگے بتایا کہ اسی عمارت میں رکن اسمبلی کا دفتر بھی ہوگا جہاں عوام کی شکایتوں کی سماعت کرتےہوئے اس کو حل کرنےکی کوشش کی جائے گی۔ بھٹکل منی ودھان سبھا کے ساتھ ساتھ کافی انتظار کے بعد اندرا کینٹین کا بھی افتتاح ہوگا۔ پروگرام میں ضلع نگراں کار وزیر شیورام ہیبار، وزیر کوٹاشری نواس پجاری وغیرہ شریک ہونگے۔ اس موقع پر عوام اپنے مسائل بھی ان کے روبرو پیش کرسکتے ہیں۔
رکن اسمبلی نے بتایاکہ پچھلے ڈھائی برسوں میں بھٹکل کی ترقی کے لئے انہوں نے 460کروڑروپئے منظور کروائے ہیں۔ تعلیم ، پینے کا پانی اور سڑک کی تعمیر کو ترجیح دی ہے۔ 5کروڑروپیوں کی لاگت سے 12جگہوں پر پینےکے پانی کا منصوبہ نافذ کیاگیاہے۔ اسی طرح منکی میں بھی 156کروڑ روپیوں کی لاگت کا کام کابینہ کی منظوری کے آخری مراحل میں ہے۔ سنیل نائک نے اس بات کا بھی دعویٰ کیا کہ انہوں نے ہی پہلی مرتبہ کڈوین کٹا ڈیم سے کیچڑ نکالنے کا کام کیا۔
بھٹکل میں 110کے وی الیکٹری سٹی کے تعلق سے سنیل نائک نے بتایا کہ اس کے قیام کو لے کر تاروں کی منتقلی کاکام جاری ہے، بہت جلد بھٹکلی عوام کا یہ خواب پورا ہوگا۔ بھٹکل میں ہائی ٹیک اسپتال کے لئے کوششیں جاری ہیں۔ وزیرا علیٰ اور میڈیکل منسٹر کو پیش کش کی جاچکی ہے۔
پریس کانفرنس میں بھٹکل بی جےپی کے صدر سبرائے دیواڑیگا، بی جے پی ضلع سکریٹری شیوانی شانتارام ، سکریٹری بھاسکر دئیمنے ، راجیش نائک، گووردھن نائک، دنیش نائک وغیرہ موجود تھے۔