کولکاتہ،16؍جنوری (ایس او نیوز؍ایجنسی) ریاستی بی جے پی کے ناراض لیڈروں کے ساتھ میٹنگ کرنے کے بعد مرکزی وزیر مملکت شانتانو ٹھاکر نے پارٹی کے ریاستی سکریٹری (تنظیم) امیتابھ چکرورتی کی سخت تنقید کرتے ہوئے کہا ہے کہ میں اپنے آنکھوں کے سامنے پارٹی کوختم ہوتے ہوئے دیکھ نہیں سکتا ۔ کلکتہ پورٹ ٹرسٹ کے گیسٹ ہاؤس میں آج ناراض بی جے پی لیڈروں کی ایک طویل میٹنگ ہوئی۔

شانتانو کے علاوہ ممبر اسمبلی سبرتو ٹھاکر بھی میٹنگ میں موجود تھے۔ شانتانو ٹھاکر نے کہاکہ ’’ہمارا مقصد وزیر اعظم اور بی جے پی کے ہاتھ مضبوط کرنا ہے۔ لیکن فی الحال مغربی بنگال میں تشکیل دی گئی کمیٹی کا پارٹی کو بنگال میں بڑے مقام پر لے جانے کا کوئی ارادہ نہیں ہے۔پارٹی اعلیٰ قیادت کو گمراہ کیا گیا ہے۔بی جےپی کو بنگال میں شدید نقصانات کا سامنا ہے۔پرانے لیڈروں کو نہ صرف ریاستی کمیٹیوں بلکہ ضلع اور بلاک اور بوتھ کمیٹیوں سے بھی باہر کردیا گیا ہے۔ نوے فیصد پرانے لیڈروں کو کنارہ لگادیا گیاہے۔

انہوں نے کہا کہ بنگال کی نئی کمیٹی نہ صرف متوا سماج بلکہ شیڈو ل کاسٹ اور بیک ورڈ کلاسوں کو بھی نئی کمیٹی میں جگہ نہیں دی گئی ہے ۔انہوں نے کہا کہ یہ سمجھ سے بالاتر ہے کہ جن لوگوں نے بھارتیہ جنتا پارٹی کو 2فیصد سے 40فیصدتک پہنچایا انہیں باہر کردیا گیا۔

انہوں نے کہا کہ کسی لیڈر کے خلاف ہماری ناراضگی نہیں ہے۔وقت آنے پر پارٹی اعلیٰ قیادت کو اس سے باخبر کرایا جائے گا۔میں کسی بھی لیڈرکو ہٹانے کے حق میں نہیں ہیں مگر بی جے پی کو مغربی بنگال میں تباہ نہیں ہونے دوں گا۔ میں ایسا کبھی نہیں ہونے دوں گا۔

ناراض بی جے پی لیڈروں کی میٹنگ کے بعد پارٹی میں کشیدگی پھیل گئی ہے۔پورٹ ٹرسٹ گیسٹ ہاؤس کے باہر حمایت اور مخالفت دونوں میں پوسٹر لگے ہوئے ہیں ۔ذرائع کے مطابق، منحرف لیڈران بی جے پی کو توڑ کر شیاما پرساد مکھرجی کے نام سے الگ پارٹی بنا سکتے ہیں۔