اڑیسہ: لوک سبھا، اسمبلی انتخابات میں لچر کارکردگی پر کانگریس ریاستی صدر نے استعفیٰ دیا
بھونیشور، 25 مئی(ایس او نیوز/آئی این ایس انڈیا) لوک سبھا اور اسمبلی انتخابات میں پارٹی کی مایوس کن کارکردگی کے بعد اڑیسہ کے کانگریس ریاستی صدرنرنجن پٹنائک نے استعفیٰ دے دیا ہے۔اڑیسہ کی کل 21 لوک سبھا سیٹوں میں سے کانگریس کو ایک نشست جبکہ 146 اسمبلی سیٹوں میں سے 9 پر ہی جیت نصیب ہوئی ہے۔اڑیسہ میں خراب کارکردگی کے لئے ذمہ داری لیتے ہوئے اڑیسہ ریاستی کانگریس کمیٹی کے صدر پٹنائک نے کہاکہ میں نے کانگریس صدر راہل گاندھی کو اپنا استعفیٰ بھیج دیا ہے۔لوک سبھا اور اسمبلی انتخابات میں کانگریس پارٹی کی ناقص کارکردگی کی اخلاقی ذمہ داری لیتے ہوئے میں نے اپنااستعفیٰ سونپاہے۔ اڑیسہ میں کانگریس کے قدآور لیڈر پٹنائک نے کہاکہ میں خود بھی اپنے کردار میں ناکام رہا ہوں،مجھے لگتا ہے کہ تنظیم کو نئے سرے سے تیارکرنے کے لیے پارٹی کوٹھوس ایکشن لینے ہوں گے۔نوجوانوں کو موقع اور موقع پرستوں کو باہر کا راستہ دکھاناہو گا۔ انہوں نے بتایاہے کہ سینئرلیڈرنرسمہامشرا کی قیادت میں بنی کمیٹی اڑیسہ میں شکست کی وجوہات بھی روشنی ڈالی گی۔بتا دیں کہ اڑیسہ میں لوک سبھاانتخابات کے ساتھ ہی اسمبلی کے انتخابات بھی ہوئے تھے۔بات اگر اسمبلی کی کریں تو کل 146 سیٹوں میں سے حکمران بیجو جنتا پارٹی کو112 نشستیں، بھارتیہ جنتا پارٹی کو 23 نشستیں، کانگریس کو 9 سیٹ ملیں۔ایک نشست آزاد ممبر اسمبلی نے جیتی۔وہیں لوک سبھا انتخابات میں ریاست کی 21 سیٹوں میں سے بی جے پی کو 8، بی جے ڈی کو 12، کانگریس کو 1 سیٹ پرکامیابی ملی ہے۔