بنگلورو،28/دسمبر (ایس او نیوز) کرناٹک میں قومی آباد رجسٹر (این اپی آر) کی تیاری کا سلسلہ 15/ اپریل 2020ء سے شروع کیا جائے گا۔ 2011ء تک مردم شماری کہلانے والے اس عمل کو موجودہ این ڈی اے حکومت نے این پی آر قرار دے کر اس کے ضوابط میں متعدد تبویلیوں کا اعلان کیا ہے۔ 

اس سلسلے میں جمعرات کو ایک اخباری کانفرنس سے خطاب کرتے ہوئے کرناٹک کے سینسس ڈائر کٹر ایس بی وجئے کمار نے کہا کہ تجرباتی بنیاد پر گنتی کا عمل شہر بنگلورو کے بعض علاقوں میں کیا جاچکا ہے۔ البتہ ریاست بھر میں مکمل طور پر این پی آر کے تحت اندراج 15/اپریل سے شروع ہوگا۔ 

انہوں نے کہا کہ این پی آر کے متعلق تفصیلات کے اندراج کے مرحلے میں مقررہ فار م میں درج کرانے والے کا نام، خاندان کے سربراہ کا نام، ان سے رشتہ داری، جنس، پیدائشی تاریخ، قومیت، پاسپورٹ نمبر، تعلیمی قابلیت، روزگار، موجودہ پتہ، مستقل پتہ، والد اور والدہ کا نام، آدھار نمبر، موبائل یا لینڈ لائین نمبر، ووٹر آئی ڈی کارڈ نمبر، پین کارڈ نمبر، ڈرائیونگ لائسنس نمبر وغیرہ کی تفصیل حاصل کی جائے گی۔ 

مسٹر وجئے کمار نے کہا کہ این پی آر کے اندراج کے مرحلے میں کوئی دستاویز دینے کی ضرورت نہیں اور نہ ہی تمام تفصیلات فراہم کرنا لازمی ہے۔ انہوں نے کہا کہ بنگلورو میں این پی آر کی شروعات کی تیاریوں کے سلسلے میں بی بی ایم پی افسروں کے ساتھ تبادلہ خیال کیا جاچکا ہے۔ انہوں نے کہا کہ اندراج کے مرحلے میں اگر تفصیلات بتانے سے انکار کرنا چاہیں تو اس کی بھی کھلی چھوٹ رہے گی۔ اطلاع فراہم کرنے کے لئے اصرار نہیں کیا جائے گا۔ 

انہوں نے کہا کہ مردم شماری کے تحت جو ہاؤزلسٹنگ کی جائے گی تو اس میں مکان مالک کا نام اور گھر میں موجود بزرگ شہریوں کے بارے میں معلومات یکجا کی جائیں گی۔ اس کے ساتھ ہی گھر میں پانی کی سہولت، پکوان کے لئے رسوئی گیس کی دستیابی، ٹی وی، لیپ ٹاپ، موبائل فون، انٹرنیٹ سہولت، کار، ٹوہیلر، خوردنی اشیاء کی خریداری کے ذرائع، اگر راشن کارڈ سے لیا جارہا ہے تو اس کے بارے میں بھی تفصیل لی جائے گی۔ 

انہوں نے کہا کہ این پی آر کے تحت اندراج کے لئے موبائل ایپ تیار کیا گیا ہے، کاغذ پر اندراج کے ساتھ ساتھ تمام تفصیلات موبائل ایپ میں بھی درج کر کے اسی وقت امیدوار کی منظوری سے اسے سرکاری ڈاٹا بیس میں اپ لوڈ کردیا جائے گا۔ انہوں نے کہا کہ ماضی کے مقابلہ رواں سال مردم شماری کے لئے اندراج میں کافی آسانی رہے گی۔ وجئے کمار نے بتایا کہ رواں سال این پی آر میں اندراج کے لئے بیشتر اسکول ٹیچروں کا استعمال کیا جائے گا۔ ٹیچرس کی خدمات حاصل کرتے ہوئے این پی آر کارروائی انجام دی جائے گی۔