تھکاوٹ نہیں، مسلسل میچ کھیلنا اچھا تجربہ:ہرمنپریت کور
ممبئی،24؍ مارچ ( ایس او نیوز؍آئی این ایس انڈیا )ہندوستان کی خاتون ٹی 20ٹیم کی کپتان ہرمنپریت کور کو مسلسل میچ کھیلنے کی خوشی ہے کیونکہ ایسا موقع ہندوستانی ٹیم کو برسوں بعد ملا ہے۔ہندوستانی خاتون ٹیم گزشتہ دو ماہ سے مسلسل کرکٹ کھیل رہی ہے۔جنوبی افریقہ میں دوسیریز جیتنے کے بعد آسٹریلیا کے ہاتھوں ون ڈے سیریز میں شکست ملی اور اب ٹی 20 سیریز چل رہی ہے۔یہ پوچھنے پر کہ کیا ٹیم تھکی ہوئی ہے، ہرمنپریت نے کہاکہ بالکل نہیں۔ہم مسلسل کھیلنے کا مزہ لے رہے ہیں۔ہمیں بی سی سی آئی سے ایسی ہی امید تھی۔اس نے کہاکہ یہ ہم سب کے لئے سبق ہے۔ہمیں پہلے مسلسل کھیلنے کا موقع نہیں ملتا تھا۔دوسیریز کے درمیان چھ یا آٹھ ہفتے کا فرق ہوتا تھا۔اس نے کہاکہ جب آپ مسلسل اتنے میچ کھیلتے ہیں تو آپ کو پتہ ہوتا ہے کہ کس طرح واپسی کرنی ہے ٹیم تھکی ہوئی نہیں ہے۔تمام کھلاڑی فٹ ہیں اور یہ اچھا تجربہ ہے۔