کاروار:29؍مارچ (ایس او نیوز)جمعہ کو کاروار کے ضلع پنچایت ہال میں انتخابی اخراجات پر نگاہ رکھنے کے لئے تشکیل دی گئیں مختلف ٹیموں کےساتھ میٹنگ کرتے ہوئے اترکنڑا لوک سبھا حلقہ انتخابی اخراجات نگراں کار ڈی ڈی منگل نےمتعلقہ ٹیموں کو الیکشن کے اخراجات پر کڑی نگاہ رکھنے کی ہدایات جاری کیں۔

انہوں نے اس موقع پرکہاکہ ہم سب ایک مقد س فریضہ کو انجام دینے کے لئے الیکشن کمیشن کی طرف سے نامزد کئے گئے ہیں۔ صاف شفاف اورمنصفانہ انتخابات کے لئے سبھی ٹیموں کا لین دین اور اخرابات پر کڑی نگاہ رکھنا ضروری ہونے کی بات کہی۔ بھارت الیکشن کمیشن کی طرف سے جاری کردہ رہنما خطوط کے مطابق ہم سب کو ذمہ داری اور ایمانداری کے ساتھ کام کرناہے۔ امیدوار اور سیاسی پارٹیوں کے لئے متعین کردہ انتخابی خرچ کے متعلق صحیح جانکاری اور حساب کتاب رکھیں۔ اس معاملے میں کسی پیچیدگی کا شکار ہوئے بغیر تمام دستاویزات کو ٹھیک ٹھیک رکھنے کی با ت کہی۔

ٹیموں کے لئے ضروری ہے کہ عوامی پروگرام، قانون کی پاسداری اور خلاف ورزی،مطبع  وغیرہ کے اخراجات کو اچھی طرح جانچ کرکے حاصل کریں۔ سوشیل میڈیا پر اور میڈیا میں جو کچھ شائع ہوتاہے اس کے تعلق سے بھی متعلقہ افسران کو رپورٹ دیں۔ ان سب میں سوشیل میڈیا اور میڈیا شعبہ جات کی ٹیموں کی طرف سے بہتر ڈیوٹی انجام دینے کی بات کہی۔