بی بی ایم پی کووِڈ مریضوں کے ساتھ نان کووِڈ مریضوں کے علاج کی طرف بھی متوجہ،رایا پورم میں مخصوص ہیلتھ سینٹر قائم کرنے ضمیر احمد خان کے مطالبہ کو بی بی ایم پی کمشنر کی فوری منظوری
بنگلورو،4؍اگست(ایس او نیوز)شہر بنگلورو میں بڑے بڑے سرکاری اسپتالوں کو مارچ 2020سے اب تک کورونا کیئر مراکز میں تبدیل کردیا گیا ہے اس کی وجہ سے ان اسپتالوں میں روزانہ علاج کے لئے رجوع ہونے والے ہزارو ں مریضوں کے لئے علاج کا کوئی متبادل ذریعہ نہیں۔ ایک طرف کورونا وائرس کے سبب روزانہ سینکڑوں لوگوں کی موت ہو رہی ہے تو دوسری طرف وہ مریض کورونا وائرس سے محفوظ ہونے کے باوجود دیگر بڑی بڑی بیماریوں میں مبتلا ہیں ان کے علاج کے لئے کوئی مناسب سرکاری سہولت موجود نہیں۔ اس کا نتیجہ یہ ہو رہا ہے کہ شہر میں مناسب علاج میسر نہ ہونے کے سبب ایسے سینکڑوں افراد کی موت واقع ہو چکی ہے جو کورونا وائرس کا بھلے ہی شکار نہ ہوئے ہوں لیکن علا ج کی قلت نے انہیں ماردیا۔ اس صورتحال سے نپٹنے کے لئے بی بی ایم پی سے کئی حلقوں سے نمائندگی ہوئی۔ بنگلورو میں غیر کورونا وائرس مریضوں کے علاج کے لئے ایک بہت بڑی سہولت شہر کے وکٹوریہ اسپتال کے احاطہ میں موجود پردھان منتری سواستھ سرکشا یوجنا(پی ایم ایس ایس وائی) کے تحت تعمیر شدہ200بستروں کے استپال کی شروعات سے ہوئی اور اسی سلسلہ کو آگے بڑھاتے ہوئے شہر کے چامراج پیٹ اسمبلی حلقہ کے رکن اسمبلی ضمیر احمد خان نے پادارئن پورا میں 50بستروں کی ایک سہولت قائم کی جو اب مریضوں کے علاج کے لئے 24گھنٹے کام کرنے لگی ہے۔ اس کے ساتھ ساتھ اب انہوں نے اپنے حلقہ میں آنے والے رایا پورم وارڈ میں ایک اور نان کووِڈ علاج کا مرکز قائم کرنے کا فیصلہ لیا ہے اور اس سے بی بی ایم پی انتظامیہ نے بھی اتفاق کر لیا ہے۔ پیر کی صبح بی بی ایم پی کمشنر این منجوناتھ پرسادنے رایا پورم وارڈ میں سنگم سرکل کے قریب موجود بی بی ایم پی کے اسپتال کی عمارت کاضمیر احمد خان کے ہمرا ہ معائنہ کیا اور اس عمارت میں 50بستروں پر مشتمل ہیلتھ کیر سنٹر کے قیام کے لئے منظوری دے دی۔ کمشنر نے اس بات سے اتفاق کیا کہ کووِڈ مریضوں کے علاج کے ساتھ دیگر امراض میں مبتلا مریضوں کے علاج کی طرف بھی توجہ ضروری ہے اگر انہیں علاج مہیا کروانے کی طرف توجہ دینے میں غفلت ہوئی تو سینکڑوں جانیں ضائع ہو سکتی ہیں۔ اس لئے انہوں نے ضمیر احمد خان کے مطالبہ کو کہ اس عمارت کا استعمال غیر کووِڈ مریضوں کے لئے استعمال کیا جائے فوری طور پر منظور کرلیا۔ انہوں نے اعلان کیا کہ اگلے چند ہی دنوں میں یہاں پر مریضوں کے علاج کا سلسلہ شروع کردیا جائے گا۔