نئی دہلی، 3 ؍مارچ (ایس او نیوز؍آئی این ایس انڈیا)پلوامہ حملے کے بعد ہندوستان کی ائر اسٹرائک کا جواب دیتے ہوئے پاکستان نے جموں و کشمیر کے راجوری میں فوجی اڈوں کو نشانہ بنانے کی کوشش کی، جس کا منہ توڑ جواب دیا گیا۔اس آپریشن میں پاکستان کی حراست میں گئے ہندوستانی فضائیہ کے ونگ کمانڈر ابھینندن کی جمعہ دیر رات وطن واپسی ہو گئی ہے، جس کے بعد سے بحث یہ ہے کہ ہندوستان کا اگلا قدم کیا ہوگا۔اسی سوال پر سابق قومی سلامتی کے مشیر شیو شنکر مینن نے کہا کہ اگلا قدم اس بنیاد پر طے ہوگا کہ حکومت پاکستان یا دہشت گردی کے خلاف کام کرنا چاہتی ہے یا انتخابات جیتنا چاہتی ہے۔

شیو شنکر مینن سے سوال کیا گیا کہ اب پاکستان اور دہشت گردی پر ہندوستان کیا کرے گا؟اس کے جواب میں انہوں نے کہا کہ آپ (حکومت) کے بعد کیا کرنا چاہتے ہیں، یہ اس پر منحصر ہے کہ آپ چاہتے کیا ہیں،انتخابات جیتنا چاہتے ہیں، پاکستان کو ہرانا چاہتے ہیں یا دہشت گردی کا خاتمہ چاہتے ہیں؟۔ان تین اختیارات پر شیو شنکر مینن نے الگ الگ رائے رکھی۔انہوں نے کہا کہ اگر ہندوستان پاکستان کا رویہ تبدیل کرنا چاہتاہے تو اس کے لئے ایک ہی حکمت عملی پر آگے نہیں بڑھا جا سکتا۔انہوں نے کہا کہ پاکستان میں حکومت ہے، ٹریڈر، فوج ہے اور دہشت گرد بھی ہیں۔ہندوستان کا اصل مسئلہ وہاں کی فوج اور دہشت گرد ہیں، اس وجہ سے ایک ہی انداز سے آگے نہیں بڑھا جا سکتا۔مینن نے کہا کہ اس کے لئے حکومت کو فوج سے لے کر سفارتی سطح تک تمام راستے اپنانے ہوں گے۔

شیو شنکر مینن نے کہا کہ اگر حکومت ہند جیش محمد جیسی دہشت گرد تنظیموں پر کارروائی کرنا چاہتی ہے تو اس کے لئے مختلف حکمت عملی پر کام کرنا ہوگا۔انہوں نے کہا کہ دہشت گردوں کے خلاف اگر ایکشن لینا ہے تو یہ ایک ایئر اسٹرائک سے نہیں ہو گا۔مینن نے کہا کہ یہ ایک طویل عمل ہے، جس میں بہت ہی خاموشی سے کام کرنا ہو گا۔انہوں نے ایئر اسٹرائک یا دوسرے کسی بھی اقدام کو امن کے ساتھ کرنے کی وکالت کی، تاکہ مستقل طور پر مسئلہ حل ہو سکے۔

بتا دیں کہ ہندوستان کے سابق این ایس اے شیو شنکر مینن کا یہ بیان آئندہ لوک سبھا انتخابات سے پہلے بہت اہم ہے۔ٹی ایم سی لیڈر ممتا بنرجی نے مودی حکومت پر جوانوں کی شہادت کا انتخابات میں استعمال کرنے کا الزام لگایا ہے،ساتھ ہی کرناٹک بی جے پی کے لیڈر بی ایس یدی یورپا بھی کہہ چکے ہیں کہ ایئراسٹرائک سے بی جے پی کو زیادہ سیٹیں جیتنے میں مدد ملے گی۔