کرناٹک: ہاسن کے بی جے پی ایم ایل اے کی اقلیتوں کودھمکی دینے کی وڈیو وائرل
بنگلورو، 13؍دسمبر (ایس او نیوز؍ایجنسی) ہاسن کے بی جے پی ایم ایل اے پریتم گوڈا کاایک ویڈیوسوشل میڈیاپر وائرل ہوا ہے جس میں وہ مسلمانوں کے علاقہ میں پہنچ کر یہ کہتے نظرآرہے ہیں کہ اگر آنے والے اسمبلی انتخابات میں انہیں ووٹ نہ دیا گیا تووہ ان کیلئے کوئی ترقیاتی کام انجام نہیں دیں گے۔ وڈیو وائرل ہونے کے بعد ایم ایل اے پر سخت تنقید کی جارہی ہے۔
ذرائع سے ملی اطلاع کے مطابق ہاسن کے رکن اسمبلی پریتم گوڑانے ہاسن میں مسلمانوں کے غلبہ والے علاقے سری نگرکالونی میں ایک جلسہ سے خطاب کرتے ہوئے کہا کہ گذشتہ چارسالوں کے دوران انہوں نے تمام برادریوں کے ارکان کواپنا بھائی سمجھاہے۔ انہوں نے مزیدکہاکہ اگرمسلمان ان کے گھرآتے ہیں تووہ انہیں کافی پیش کریں گے لیکن ترقیاتی سرگرمیوں کویقینی نہیں بنائیں گے اوران کی ضرورت کوپورا نہیں کریں گے۔ پریتم گوڈاکا کہنا تھا کہ میں آپ کے ساتھ بھائیوں جیسامساوی سلوک کرتارہوں گالیکن 2018 کے اسمبلی انتخابات اوربلدی انتخابات میں آپ نے مجھے ووٹ نہیں دیاہے۔
پریتم گوڈا کا کہنا تھا کہ پارلیمانی انتخابات میں بھی آپ نے (یعنی مسلمانوں نے) بی جے پی کوووٹ نہیں دیا۔ انہوں نے ہجوم سے خطاب کرتے ہوئے کہاکہ آپ سب یومیہ اجرت پر کام کرنے والے ورکرہیں۔ اگرآپ کی اجرت نہ دی جائے تو آپ برہم ہوجائیں گے۔ آپ کے خیال میں اگرمجھ سے کام لینے کے بعد بھی آپ مجھے ووٹ نہ دیں تو کیامجھے برانہیں لگے گا؟۔