کرناٹک میں سنڈے لاک ڈاون منسوخ؛ کل 31 مئی کو نہیں ہوگا لاک ڈاون؛ عام دنوں کی طرح رہے گی چھوٹ؛ بھٹکل میں بھی صبح سے دوپہر تک کھلیں گی دکانیں
بھٹکل 30/مئی (ایس او نیوز) کرناٹک کے وزیراعلیٰ یڈی یورپا نے بیان دیا ہے کہ ریاست کرناٹک میں کل 31/مئی اتوار کو گذشتہ اتوار کی طرح لاک ڈاون نہیں رہے گا۔ سنیچر کو بنگلور میں اخبار نویسوں سے گفتگو کرتے ہوئے یڈی یورپا نے بتایا کہ اتوار کے لاک ڈاون کو ریاست سے ہٹادیا گیا ہے اور کل اتوار کو دیگر ایام کی طرح ہی لوگوں کو لاک ڈاون میں چھوٹ رہے گی۔
یڈی یورپا کے اس بیان کے بعد بھٹکل اسسٹنٹ کمشنر بھرت نے اخباری بیان جاری کرتے ہوئے کہا ہے کہ بھٹکل میں آج کی طرح ہی کل اتوار کو بھی صبح آٹھ بجے سے دوپہر دوبجے تک ضروری اشیا ء والی دکانیں کھلیں گی، مگر دو بجے کے بعد ہمیشہ کی طرح مکمل طور پر شہر میں لاک ڈاون رہے گا۔ اے سی نے اس تعلق سے عوام الناس سے درخواست کی ہے کہ وہ سوشیل ڈیسٹنسنگ کا پاس ولحاظ رکھتے ہوئے اور ماسک پہن کر ہی گھروں سے باہرنکل سکیں گے۔ اے سی نے یہ بھی بتایا کہ بھٹکل کی مدینہ کالونی، عثمانیہ کالونی، گڈلک روڈ، کوگتی نگر اور سلطان اسٹریٹ جسے کٹنمینٹ زون میں شمار کیا گیا ہے، یہاں یہ چھوٹ نہیں رہے گی۔
یاد رہے کہ اس سے قبل ریاستی حکومت نے تمام اضلاع کے ڈپٹی کمشنرس کو یہ ہدایات دی تھی کہ عام حالات میں جس طرح لوگوں کو راحت دی گئی ہے، وہ اتوار کو نہیں دی جائے گی اور اتوار کو چونکہ اکثر دکانیں اور کمپنیاں بند رہتی ہیں جس کےچلتے زیادہ تعداد میں لوگ راستوں میں آنے کا خدشہ ہے، اس بنا پراتوار کو پوری ریاست میں لاک ڈاون رہے گا، مگر آج سنیچر کو یڈی یورپا نے اپنا وہ فرمان واپس لیتے ہوئے عوام کو اجازت دی ہے کہ کل اتوار کو وہ معمول کے مطابق ضروری اشیاء کی دکانوں سے اپنی ضروریات کی چیزیں خرید سکتے ہیں۔
