بھٹکل سے میڈیکل ضروریات کے تحت اُڈپی یا مینگلور جانے اور واپس آنے میں کوئی روک نہیں ؛ اسسٹنٹ کمشنر کا بیان
بھٹکل 10/جولائی (ایس او نیوز) میڈیکل ضروریات کے تحت کوئی اگر بھٹکل سے کنداپور یا مینگلور جاتا ہے اور واپس بھٹکل آتا ہے تو اس کے لئے کسی قسم کی اجازت لینے کی ضرورت نہیں ہے،ایسے لوگ صبح جاکر شام کو واپس لوٹ سکتے ہیں، اس بات کی اطلاع بھٹکل اسسٹنٹ کمشنر مسٹر بھرت نے دی۔
ساحل آن لائن سے وہاٹس ایپ پر تفصیلات فراہم کرتے ہوئے انہوں نے بتایا کہ بھٹکل کے اکثر لوگ صبح مینگلور یا اُڈپی علاج معالجہ کے لئے جاتے ہیں اور شام کو اپنا کام نپٹا کر واپس آجاتے ہیں، ایسے لوگوں کے لئے کوئی روک نہیں ہے اور ایسے لوگوں کو سرکارسے کسی طرح کی اجازت لینے کی بھی ضرورت نہیں ہے۔
خیال رہے کہ حال ہی میں ڈپٹی کمشنر اُترکنڑا ڈاکٹر ہریش کمار کی جانب سے ایک سوکیولر جاری کی گیا تھا جس میں لکھا گیا ہے کہ 10 جولائی سے اگلا حکم جاری ہونے تک دوسرے دیش، دوسری ریاست، دوسرے ضلع یہاں تک کہ دوسرے تعلقہ جات سے بھی بھٹکل ٹاون یا جالی پٹن پنچایت میں داخل ہونے کی اجازت نہیں ہوگی۔ اس تعلق سے ساحل آن لائن نے بھٹکل کے اسسٹنٹ کمشنر مسٹر بھرت سے وضاحت چاہی کہ بھٹکل کے اکثر لوگ علاج معالجہ کے لئے صبح سویرے مینگلور جاتے ہیں اور شام کو واپس آتے ہیں، کیا اب آئندہ ایساکرنے پر پابندی ہوگی تو انہوں نے جواب دیا کہ نہیں۔۔کوئی پابندی نہیں ہوگی۔ یہ لوگ علاج کے لئے جاسکتے ہیں اور شام کو واپس آسکتے ہیں ایسوں کے لئے کوئی روک نہیں ہے۔