اُڈپی:9؍جون (ایس اؤ نیوز)ریاست میں متعینہ تواریخ کو ایس ایس ایل سی کے امتحانات سبھی احتیاطی تدایبر کے ساتھ  منعقد ہونگے اس سلسلے میں کسی بھی پیچیدگی کا شکار  ہونے کی ضرورت نہیں ہیں، یہ بات  ریاستی وزیر تعلیم سریش کمار نے کہی۔

اُڈپی میں اخبار نویسوں سے گفتگو کرتے ہوئے سریش کمار نے بتایا کہ ریاست میں ہائی کورٹ نے امتحانات کے انعقاد کے لئے کچھ ہدایات دیتے ہوئے  منظوری دی ہے، اسی پر عمل  کرتے ہوئے امتحانات کا انعقاد کیا جائے گا۔ انہوں نے بتایا کہ ہم نے طلبا کی صحت کا خاص خیال رکھتےہوئے امتحان گاہ میں بہت ساری تبدیلیاں کی ہیں۔ اس سلسلے میں دیگر محکمہ جات کے تعاون سے بات چیت چل رہی ہے ، طلبا کو امتحان گاہ تک پہنچانے کے لئے بس سرویس کا انتظام رہے گا۔ سبھی بچوں کو ماسک دئیے جائیں گے۔ ہمیں امید ہے کہ ایک بہتر ماحول میں ہم امتحانات منعقد کریں گے۔

خیال رہے کہ تلنگانہ اور تمل ناڈو میں دسویں جماعت کے امتحانات کو رد کیا گیا ہے اور سبھی طلبا کو کامیاب قرار دیا گیا ہے، ایسے میں کرناٹک کے وزیر تعلیم کے اس تازہ بیان کے بعد دسویں امتحانات کو لے کر ریاست بھر میں چل رہی  چہ مگوئیوں پر   روک لگادی  ہے۔

امتحانات کے متعلق وزیر تعلیم نے بتایا کہ ایک امتحانی کمرے میں 18طلبا بیٹھیں گے۔ طلبا کی ذہنی تیاری کے لئےجون  12سے 20 تک رویزن کلاسس ہونگے۔ اس موقع پر انہوں نے ایک سوال کے جواب میں کہاکہ ریاست میں جلد بازی میں اسکولوں کو دوبارہ شروع نہیں کیا جائے گا۔