سی اے اے کیخلاف قرار دادیں ’’دستوری اعتبار سے بھیانک غلطی‘‘ ، کوئی طاقت کشمیری پنڈتوں کو کشمیر واپس جانے سے نہیں روک سکتی ؛ منگلورو میں ریالی سے راجناتھ سنگھ کا خطاب
منگلورو،28؍ جنوری (ایس او نیوز؍ پی ٹی آئی) وزیر دفاع راجناتھ سنگھ نے آج اپوزیشن پارٹیوں کو ہدف تنقید بناتے ہوئےاُن سے خواہش کی ہے کہ یہ پارٹیاں ‘ جہاں اُن کی اکثریت ہے، ریاستی اسمبلیوں میں سی اے اے کیخلاف قرار دادیں منظور کرتے ہوئے ’’دستوری اعتبار سے بھیانک غلطی ‘‘ نہ کریں۔ راجنا تھ سنگھ نے اپوزیشن پارٹیوں کو مشورہ دیا کہ وہ اپنے ’’وِپکش دھرم‘‘ کیلئے ’’ راشٹرادھرما ‘‘ کو بھول نہ جائیں۔
سینئر بی جے پی لیڈر راجناتھ سنگھ نے یہاں ایک ریالی سے خطاب کرتے ہوئے اس بات پر زور دیا ہے کہ کوئی بھی طاقت ، اب کشمیری پنڈتوں کو ، کشمیر واپس جانے سے نہیں روک سکتی۔ راجناتھ سنگھ نے جموں وکشمیر کی تنظیم جدید اور 370کے تحت اُس کو حاصل خصوصی موقف کی تنسیخ کے ، مودی حکومت کے فیصلہ پر زورمدافعت کی۔
اُنہوں نے پاکستان کو ایک سخت پیام بھی بھیجا اور کہا کہ ہندوستان کسی کو ہاتھ نہیں لگائے گا لیکن اگر کوئی اُس کو پریشان کرتا ہے تو ایسوں کو امن کے ساتھ جینے نہیں دیا جائے گا۔ مرممہ شہریت قانون کی پر زور مدافعت کرتے ہوئے انہوں نے کہا کہ یہ قانون ، کسی مذہب کے جذبات کو مجروح کرنے کیلئے نہیں ہے بلکہ پاکستان ، بنگلہ دیش اور افغانستان جیسے غیر سیکولر ممالک میں مذہبی ایذارسانی کے شکار افراد کو ریلیف دینے کیلئے ہے۔
راجناتھ سنگھ نے مزید کہا کہ وزیر اعظم نریندر مودی، جنہوں نے ’سب کا ساتھ ، سب کا وکاس اور سب کا واشوس‘ کا نعرہ دیا ہے، مذہب کی بنیاد پر ہر گز امتیاز نہیں برتیں گے۔ راجناتھ سنگھ نے کہا کہ ہندوستانی مسلمانوں کی شہریت کو کوئی نقصان نہیں پہنچے گا۔
اُنہوں نے کہا کہ اپوزیشن جماعتیں سوال اُٹھاتی ہیں کہ اگر ہندوؤں ،سکھوں، بدھسٹوں، جینوں، پارسیوں اور عیسائیوں کو شہریت دی جاسکتی ہے تو مذکورہ تین ممالک کے مسلمانوں کو کیوں نہیں دی جاسکتی۔ راجناتھ سنگھ نے بتایا کہ ’’مذکورہ تینوں ممالک ‘‘ سیکولر نہیں ہیں۔ یہ مذہبی مملکتیں ہیں۔ ان تینوں ممالک کا مذہب اسلام ہے۔ ہندوستان کا مذہب، ہندو مت نہیں ہے۔ ہندوستان ایک سیکولر ملک ہے۔ پاکستان، بنگلہ دیش اور افغانستان میں جو لوگ اسلام پر عمل کرتے ہیں اُنہیں ایذا نہیں پہنچائی جاسکتی ۔ اپوزیشن کی زیر حکومت کئی ریاستوں کے اِس فیصلہ کے بیچ کہ سی اے اے پر عمل نہیں کیا جائے گا۔راجناتھ سنگھ نے کہا کہ کہ سی اے اے ، ایک مرکزی قانون ہے اور ہر شخص کو اس پر عمل کرنا ہے۔ اُنہوں نے الزام لگایا کہ اس مسئلہ پر کانگریس عوام کو گمراہ کررہی ہے۔