نئی دہلی،9ستمبر(ایس او نیوز/آئی این ایس انڈیا) آئی این ایکس میڈیا معاملے میں گرفتار سابق وزیر خزانہ اور کانگریس کے سینئر لیڈر پی چدمبرم نے پیر کو کہا کہ ان سے جڑے معاملے میں کسی بھی افسر کی گرفتاری نہیں ہونی چاہئے کیونکہ کسی نے کچھ غلط نہیں کیا ہے۔چدمبرم کی جانب سے ان کے خاندان نے ان کے سرکاری ٹوئٹر ہینڈل پر یہ تبصرہ پوسٹ کیا۔چدمبرم نے کہاکہ لوگوں نے مجھ سے پوچھا کہ اگر آپ معاملے کو تجویز کرنے اور عمل کو آگے بڑھانے والے درجنوں افسران کو گرفتار نہیں کیا گیا تو آپ کو کیوں گرفتار کیا گیا۔ انہوں نے کہاکہ میرے پاس کوئی جواب نہیں ہے،کسی افسر نے کچھ غلط نہیں کیا ہے،میں نہیں چاہتا کہ کسی کی گرفتاری ہو۔ واضح رہے کہ چدمبرم کو سی بی آئی نے آئی این ایکس میڈیا معاملے میں گرفتار کیا ہے،فی الحال وہ عدالتی حراست میں ہیں اور تہاڑ جیل میں بند ہیں۔