بھٹکل12/ مئی (ایس او نیوز) ریاست کرناٹک میں کورونا کے معاملات میں روز بروز اضافہ ہورہا ہے اور روزانہ سامنے آنے والے کیسس کی روزانہ کی تعداد 30 سے بڑھ کر اب 40 کو بھی کراس کررہی ہے۔ جس کو لے کر عوام میں سخت تشویش پائی جارہی ہے۔

آج منگل صبح سرکارکی جانب سے جاری کردہ بلٹین کےمطابق کل پیر شام پانچ بجے سے آج منگل صبح 12 بجے تک کورونا پوزیٹو کے 42 معاملات سامنے آئے ہیں۔جس کے ساتھ ہی کرناٹک میں کورونا سے متاثرہ مریضوں کی تعداد بڑھ کر 904 ہوگئی ہے۔

بلٹین کے مطابق کرناٹک میں سب سے زیادہ  معاملات آج  باگلکوٹ سے ہے جہاں 15 لوگوں کی رپورٹ کورونا پوزیٹو آئی ہے، دھارواڑ سے9 اور ہاسن سے 5 کی رپورٹ کورونا پوزیٹو ہے۔ اسی طرح  ضلع جنوبی کینرا سے دو کی رپورٹ پوزیٹو آئی ہے۔ بنگلورشہر  سے تین، یادگیری اور بیدر سے دو۔ دو،  بلاری، چکبالاپور، کلبرگی اور  منڈیا سے ایک ایک رپورٹ کورونا پوزیٹو آئی ہے۔

بھٹکل اور ضلع اُترکنڑا کے عوام  کے لئے راحت کی خبر یہ ہے کہ کل پیر اور آج منگل کو بھی کورونا کا کوئی نیا معاملہ سامنے نہیں آیا ہے۔ البتہ بھٹکل کے لئے خطرہ بنا ہوا ہے کیونکہ کئی ایک کی رپورٹس موصول ہونی باقی ہے۔

عوام کی بے چینی  کو دیکھتے ہوئے جانکاری حاصل کرنے  نوڈل  آفیسرکا منگلورو دورہ:   بھٹکل میں پچھلے چند دنوں سے کووِڈ 19کے بڑھتے ہوئے معاملات کے ساتھ عوام کے اندر جانچ رپورٹس کے بارے میں بھی کچھ لوگوں کی طرف سے شک وشبہ کا اظہار کیا جارہا تھا۔    عوام کے اندر پائی جارہی بے چینی کو دیکھتے ہوئے کورونا کے مریضوں کے معاملات کو ہینڈل کرنے  بھٹکل میں تعین نوڈل آفسر ڈاکٹر شرتھ نائیک نے پیر کو  خود ہی جانکاری حاصل کرنے کے لئے  منگلورو کادورہ کیا۔

ضلع شمالی کینرا سے سیکڑوں لوگوں کے گلے سے تھوک کے نمونے جانچ کے لئے روانہ کیے گئے ہیں۔ابھی کئی لوگوں کی رپورٹس آنی باقی ہے۔ اس دوران ابتدائی او رثانوی رابطے والے افراد کے تعلق سے کچھ الجھنیں بھی پیدا ہوگئی تھیں۔ایک آدھ رپورٹس اَدل بدل ہوجانے کا بھی الزام سامنے آیا ہے۔ان حالات کے پیش نظر لیباریٹری سے بعض معاملات کی جانچ رپورٹ دوبارہ حاصل کرنے کی بات بھی معلوم ہوئی ہے۔

مینگلور سے بھٹکل لوٹنے کے بعد ڈاکٹر شرتھ  نائیک نے بتایا کہ ابتدائی اور ثانوی رابطے والے افراد میں سے 12 لوگوں کی رپورٹس موصول ہونی باقی تھی،  اب    پانچ لوگوں کی رپورٹس آنی  باقی ہے، اس مناسبت سے دیگر سات لوگوں کی رپورٹس نیگیٹو آئی ہے۔ ساحل آن لائن سے گفتگو کرتے ہوئے ڈاکٹر شرتھ نائک نے بتایا کہ  بہت سارے سیمپلوں کی رپورٹ ملنی باقی ہے،  اس مناسبت سے مکمل تفصیلات کے لئے کچھ وقت درکار ہے۔