بنگلورو، 19؍جولائی (ایس او نیوز) کرناٹکا کے 32 اضلاع میں واقع 541 پی یو کالجوں میں امسال ایک طالب علم نے بھی داخلہ نہیں لیا ہے اور قانون کے مطابق ایسے کالجوں کو بند کرنے کی نوبت آ گئی ہے ۔  اب جن کالجوں میں داخلہ کی شرح صفر ہونے کی جو رپورٹ موصول ہوئی ہے اس کے مطابق ان کالجوں کی تعداد اس طرح ہے : جنوبی بنگلورو 93 ، شمالی بنگلورو 61 ، بیچاپور 26 ، ٹمکور24 ، میسورو 24 ، کلبرگی 23، چترادرگہ 21، داونگیرے 19، چکمگلورو، دھارواڑ 18 ، بیدر18 ، چکوڈی 17، چکبالاپور 16، رائچور15، ہاسن 15، بیلگاوی 15 ، بلاری 13، باگلکوٹ 11، کولار 10، منگلورو 10 ،ہاویری 8 ، یادگیر 8، اڈپی 7 ، چامراج نگر 5، رام نگر 5 ، گدک 5 ، کوپل 5 ، شمالی کینرا 3 ہے ۔ 
    
قانون کے مطابق کسی کالج کو جاری رہنے کے لئے وہاں پر 40 طلبہ کا داخلہ ہونا ضروری ہے ۔ محکمہ تعلیمات نے کووڈ سے پیدا شدہ صورتحال کو نظر میں رکھتے ہوئے ان کالجوں کو طلبہ کا داخلہ کرنے کے لئے ایک سال کی مشروط اجازت دی ہے ۔ نئے داخلے کی مدت ختم ہونے کے بعد معائنہ کمیٹی ان کالجوں میں پہنچ کر وہاں کے حالات کا جائزہ لے گی اور ضابطے کے مطابق کم از کم 40 طلبہ کا داخلہ ہونے اور انہیں پڑھانے کے لئے ضروری تعداد میں ٹیچنگ اسٹاف موجود ہونے کی صورت میں ہی تعلیمی سال 2022-23   کے لئے تعلیم جاری رکھنے کی اجازت دی جائے گی۔