کرناٹک میں اب کہیں بھی نہیں ہوگا لاک ڈاون؛ عوام کو خود اپنی صحت کی کرنی ہوگی فکر؛ وزیراعلیٰ یڈی یورپا کا بیان، رات نو سے صبح پانچ تک جاری رہے گا کرفیو
بنگلور 21 جولائی (ایس او نیوز) کرناٹک کے وزیراعلیٰ بی ایس یڈی یورپا نے اعلان کیا ہے کہ ریاست میں اب کہیں پر بھی لاک ڈاون نہیں ہوگا، بھلے ہی کسی ضلع میں کورونا کے زیادہ معاملات سامنے آرہے ہوں۔
سوشیل میڈیا پر عوام الناس سے خطاب کرتے ہوئے یڈی یورپا نے کہا کہ کورونا سے بچنے کے لئے لاک ڈاون حل نہیں ہے اس لئے کل بدھ 22 جولائی سے بنگلور ہویا ریاست کا کوئی بھی ضلع ہو، کہیں پر بھی لاک ڈاون نہیں ہوگا۔ البتہ انہوں نے ضلعی انتظامیہ پرزور دیا کہ وہ اپنے اپنے علاقوں میں سماجی فاصلہ برقرار رکھنے اور ماسک پہن کر گھروں سے باہرنکلنے کو یقینی بنائیں۔ انہوں نے عوام الناس سے کہا کہ وہ کل سے اپنے اپنے کام پر لوٹ جائیں اور تاجر حضرات اپنے کاروبار پر واپس لگ جائیں۔
حکومت کی جانب سے جاری اعلامیہ میں یہ بھی کہا گیا ہے کہ سنڈے لاک ڈاون جاری رہے گا، اسی طرح رات نو بجے سے صبح پانچ بجے کا کرفیوبھی جاری رہے گا۔
انہوں نے عمر رسیدہ لوگوں کے لئے کہا کہ وہ اپنی صحت کا زیادہ خیال رکھیں اور گھروں سے باہرنہ نکلیں۔ انہوں نے عوام سے کورونا سے خوف نہ کھانے کی بھی بات کہی اور کہا کہ جتنے لوگ کورونا سے متاثر ہوتے ہیں، 98 فیصد لوگ صحت یاب ہوکر اسپتالوں سے ڈسچارج ہورہے ہیں، اس لئے کورونا کو لے کر کسی کو ڈرنے کی بالکل ضرورت نہیں ہے۔
تھوک کے نمونے جانچ کے لئے روانہ کرنے کے بعد فوری رپورٹ نہ ملنے پر انہوں نے کہا کہ حکومت اس بات کو اب یقینی بنائے گی کہ 24 گھنٹوں کے اندر کورونا کی رپورٹ فراہم کی جائے۔
لاک ڈاون کو ختم کرنے کے تعلق سے یڈی یورپا نے کیا کہا، وڈیو دیکھیں: