کرناٹک میں کووڈ۔19 کمیونٹی پھیلاؤ کا کوئی امکان نہیں، مرکزی ٹیم کا چیف منسٹر و عہدیداروں کے ساتھ تبادلہ خیال؛ سری راملو کی پریس کانفرنس
بنگلورو، 8؍ جولائی (ایس او نیوز) کرناٹک نے منگل کے روز مرکز ی ٹیم کو بتایا کہ ریاست میں کووڈ۔19 کے کمیونٹی پھیلاؤ کا کوئی امکان نہیں ہے۔ریاستی وزیر صحت و خاندانی بہبود بی سری راملو نے میڈیا سے کہا ’’ ہم نے یہ واضح کردیا ہے کہ یہاں کمیونٹی پھیلاؤ کا امکان نہیں ہے۔ ہم ، دوسرے اور تیسرے مرحلہ کے درمیان ہیں‘‘۔ انہوں نے ہم سے کہا ہے کہ اس بات کو یقینی بنائیں کہ ہم تیسرے مرحلہ میں داخل نہ ہوں ۔ مرکزی ٹیم جس میں مرکزی وزارت صحت کی ایڈیشنل سکریٹری آرتی آہوجا اور نظامت جنرل برائے صحت کی خدمات کے ڈائرکٹر (ایمرجنسی میڈیکل رسپانس) ڈاکٹر پی رویندرن شامل ہیں، نے چیف منسٹر بی ایس یڈیورپا، وزیر طبی تعلیم کے سدھا کر ، چیف سکریٹری ٹیم ایم وجئے بھاسکر، سری راملو و دیگر عہدیداروں سے وباء کی روک تھام کیلئے اختیار کردہ تدابیر پر بات چیت کی۔
سری راملو نے کہا ’’ ان کی رائے یہ تھی کہ کنٹین منٹ زون میں مزید ٹسٹ کروانے کی ضرورت ہے۔‘‘ انہوں نے کہا کہ کرناٹک اب تک بہتر کارکردگی کا مظاہرہ کیا ہے اور ہمیں آگے بڑھنے کے لئے بہتر کام کرنے کی ضرورت ہے۔حکومت کا یہ دعویٰ کہ کووڈ۔19 میں کمیونٹی پھیلاؤ نہیں ہورہا ہے ایسے وقت سامنے آیا ہے جب ریاست، خاص طور پر بنگلورو میں مثبت واقعات کی تعداد میں بڑی تیزی سے اضافہ ہورہا ہے۔
کرناٹک میں 25317 مثبت کووڈ۔19 واقعات دیکھنے میں آئے ہیں جن میں سے 10527 افراد صحت یاب ہوئے ہیں۔ بنگلورو اربن ضلع میں 14384 کے منجملہ 8860 فعال معاملات ہیں۔ کرناٹک کے کووڈ۔19 وار روم کے 25317 واقعات میں سے ایک تجزیہ کے مطابق 13019 معاملات میں ٹراسمیشن کا ذریعہ ابھی زیر تفتیش ہے۔