نئی دہلی،30؍مارچ (ایس او نیوز؍ پی ٹی آئی) پنجاب نیشنل بینک (پی این بی) گھوٹالے کے اہم ملزم ہیرا کاروباری نیرومودی کی ضمانت کی عرضی خارج کردی گئی ہے ۔ لندن کی ویسٹ منسٹر عدالت میں نیرومودی کی ضمانت پر سماعت چل رہی تھی ۔ سماعت کے دوران ہندوستان کی جانب سے پیروی کرتے ہوئے بیرسٹر ٹوبی کیڈمین نے عدالت میں کہاکہ نیرومودی ہندوستانی ایجنسیوں کے ساتھ تعاون نہیں کررہا ہے ۔اوراس کے فرار ہونے کا ڈر ہے ۔ٹوبی نے کہاکہ اس بات کا بھی امکان ہے کہ وہ گواہوں کو ورغلاسکتا ہے اور ثبوت ضائع کرسکتا ہے ۔ کیڈ مین نے عدالت میں کہاکہ نیرومودی نے ایک گواہ کو بلاکر دھمکی دی ہے کہ وہ اسے جان سے ماردے گا۔ دوسری جانب نیرومودی کے وکیل فلیئر مونت گومری نے کہاکہ نیروجنوری 2018 سے برطانیہ میں ہے ۔ اسے اگست 2018 سے پتا ہے کہ اس کے پاس محفوظ پناہ گاہ کی شکل میں کوئی جگہ نہیں ہے ۔وہ برطانیہ میں کھلے عام رہتا ہے اوراس نے چھپنے کی کوئی کوشش نہیں کی ہے ۔ اس سے پہلے لندن کے ویسٹ منسٹر مجسٹریٹ کی عدالت میں ہندوستانی افسروں کی جانب سے پیروی کرنے والے ٹوبی کیڈ مین نے خبررساں ایجنسی کو بتایا کہ نیرومودی کو ضمانت ملنے پر ہم اس کے خلاف ہائی کورٹ میں اپیل کریں گے ۔ ہم وہ سب کچھ کریں گے جس سے وہ رہا نہ ہوسکے۔ معلوم ہوکہ جوائنٹ ڈائرکٹرستیہ ورت کمار نیروکیس کی پیروی کیلئے لندن میں ہی ہیں ۔ وہ اس کیس کے اہم تفتیشی افسر ہیں۔قبل ازیں نیرومودی کی ضمانت پر ضمانت کو لے کر ای ڈی اور مرکزی جانچ بیورو( سی بی آئی) کی ٹیم ویسٹ منسٹر پہنچ چکی ہے ۔ سی بی آئی اور ای ڈی ٹیم اپنے ساتھ نیرومودی، اس کی بیوی یمی اس کے ماموں مہیوال چوکسی اوردیگر کے خلاف دائر چارج شیٹ کی نقل بھی لے گئی ہے ۔ای ڈی کے حکام نیرواوراس کی کمپنیوں کی 147کروڑ روپئے کی املاک سے جڑی دستاویز بھی ساتھ لے گئے ہیں ۔