نئی دہلی،11؍جولائی(ایس او نیوز؍ایجنسی)  نیشنل انسٹی ٹیوٹ آف اوپن اسکولنگ (این آئی او ایس) نے مارچ 2020 کے لیے مقرر سیکنڈری اور ہائر سیکنڈری کورسیز کے لیے اپنے امتحانات رد کر دیے ہیں۔ فروغ انسانی وسائل کے مرکزی وزیر ڈاکٹر رمیش پوکھریال نشنک نے آج کہا کہ "اب تک ہم نے اپنے تمام فیصلے طلبا کی صحت اور مفادات کو مدنظر رکھتے ہوئے کیا ہے، اسی طرح این آئی او ایس سے تعلیم حاصل کرنے والے طلباء کی صحت اور ان کے مفادات کے مدنظر ہم نے ان امتحانات کو منسوخ کرنے کا فیصلہ کیا ہے۔ میں ایک بار پھر تمام طلباء اور والدین کو یقین دلاتا ہوں کہ حکومت ہند اور فروغ انسانی وسائل کی وزارت تمام طلبا کا مستقبل محفوظ رکھ کر ہی کام کرے گی"۔

قبل ازیں یہ امتحانات کورونا بحران کے پیش نظر مارچ سے 17 جولائی تک شیڈول کیے گئے تھے۔ اس کے علاوہ، تجرباتی امتحانات (پریکٹیکل) کو بھی درمیان میں ہی روک دیا گیا تھا۔ طلبا کی صحت اور مفادات کا خیال کرتے ہوئے این آئی او ایس کی "مجاز کمیٹی" ایویلیوشن پلان کی بنیاد پر طلبا کا ایویلیوشن (تشخیص، اندازہ) کرے گی۔ اس امتحان کے لیے 3.67 لاکھ سے زیادہ طلبا نے رجسٹریشن کروایا ہے۔ سینئر سیکنڈری امتحانات کے لیے 2.10 لاکھ طلبا نے رجسٹریشن کروایا تھا۔

اس کے علاوہ این آئی او ایس نے طلباء کی کارکردگی کو بہتر بنانے کے لیے اگلے امتحانات یا آن ڈیمانڈ امتحانات دینے کا آپشن بھی دیا ہے۔ یہ امتحانات اس وقت منعقد کیے جائیں گے جب حالات سازگار ہوں گے۔ اس سلسلے میں تمام معلومات این آئی او ایس کی ویب سائٹ پر دستیاب ہوں گی۔