لاک ڈاؤن میں سختی کا نتیجہ: بنگلورومیں گزشتہ 3دنوں سے ایک بھی پازیٹیوکیس نہیں
بنگلورو،23؍اپریل(ایس او نیوز) ملک بھرمیں نہایت تیزی سے پھیل رہے مہاماری کوروناوائرس پر قابوپانے کے لیے مرکزی حکومت کی جانب سے اعلان کردہ دوسرے مرحلہ کالاک ڈاؤن ثمرآورثابت ہورہاہے،یہی وجہ ہے کہ ابتدامیں جس طرح بنگلورومیں کوروناوائرس کے معاملا ت زیادہ تعداد میں پیش آرہے تھے اوراب اس میں کمی آگئی۔
بنگلورومیں ہرگزرتے دن کے ساتھ کوروناوائرس کے پازیٹومعاملے کم ہوتے جارہے ہیں،گزشتہ تین دنوں سے شہر میں ایک بھی نیامعاملہ پیش نہیں آیا۔ریاست میں گزشتہ 24گھنٹوں کے دوران صرف 9نئے کیس درج کئے گئے ہیں۔
اس طرح ریاست میں کوروناوائرس کے متاثرین کی تعدادبڑھ کر418ہوگئی،جس میں بنگلورسے تعلق رکھنے والے صرف 89کیس ہیں،خوشی کی بات یہ ہے کہ تین دنوں سے شہر میں ایک بھی کوروناپازیٹومعاملہ پیش نہیں آیا۔
