وادی کشمیر کے مختلف اضلاع میں این آئی اے کے چھاپے
سری نگر، 20؍اکتوبر (ایس او نیوز؍ایجنسی) قومی تحقیقاتی ایجنسی (این آئی اے) نے بدھ کی صبح وادی کشمیر کے مختلف اضلاع میں کئی مقامات پر چھاپے مارے۔ این آئی اے کی طرف سے جموں و کشمیر ملی ٹنسی سازش کیس کے سلسلے میں چھاپہ ماری کا یہ سلسلہ گزشتہ کئی روز سے جاری ہے۔ سرکاری ذرائع نے بتایا کہ این آئی اے نے بدھ کی صبح وادی کے مختلف اضلاع میں 11 مقامات پر چھاپے مارے۔
بتادیں کہ این آئی اے نے گزشتہ ہفتے ملی ٹنٹوں کے ساتھ مبینہ رابطے ہونے کے پاداش میں نو مشتبہ افراد کی گرفتاری عمل میں لائی تھی۔ این آئی اے نے اس ضمن میں دس اکتوبر کو ایک کیس درج کیا تھا۔ قومی تحقیقاتی ایجنسی امکانی طور پر وادی کشمیر میں ہونے والی حالیہ ہلاکتوں کی تحقیقات کی ذمہ داری بھی سنبھالے گی۔