منگلورو ،5؍ اگست (ایس او نیوز) کل 4 اگست کو کشمیر ، بنگلورو اور مینگلورو میں تین مقامات پر بیک وقت چھاپہ ماری کے بعد نیشنل انویسٹی گیشن ایجنسی کے افسران نے کشمیر سے دو بنگلورو سے ایک اور منگلورو سے ایک شخص کو شام کی دہشت گرد تنظیم آئی ایس آئی ایس موڈیول چلانے کے الزام میں  گرفتار کیا ۔
    
موصولہ رپورٹ کے مطابق منگلورو الال سے گرفتار کیے گئے شخص کا نام عمار عبدالرحمٰن  ہے جبکہ بنگلورو سے شنکر وینکٹیش پیرومل عرف علی معاویہ اور کشمیر سے عبید حامد اور مزمل حسن کو گرفتار کیا گیا ہے۔ مبینہ طور پر یہ لوگ نوجوانوں کی ذہن سازی کرنے، انہیں آئی ایس آئی ایس میں شمولیت کی ترغیب دلانے اور آئی ایس آئی ایس کے لئے فنڈ اکٹھا کرنے میں ملوث تھے ۔
    
این آئی اے ذرائع کے مطابق ایجنسی نے امسال مارچ میں سات معلوم اور بقیہ نامعلوم افراد کے خلاف دہشت گردانہ سرگرمیوں کے لئے انڈین پینل کوڈ اور یواے پی اے  کے تحت از خود ایک کیس رجسٹر کیا تھا ۔ اس میں کیرالہ کے محمد امین عرف ابو یحییٰ اور اس کے ساتھیوں کو ٹیلی گرام، ہُوپ اور انسٹاگرام جیسے سوشیل میڈیا چینلوں پر شدت پسندانہ پروپگینڈا، ذہن سازی اور نئے افراد کو اپنی جہادی تنظیم میں شامل کرنے کا ملزم بنایا گیا تھا۔
    
اس سے پہلے مارچ میں  این آئی اے نے محمد امین، ڈاکٹر رئیس رشید اور مصعب انور کے ٹھکانوں پر چھاپہ ماری اور تلاشی کے بعد ان تینوں کو گرفتار کیا تھا۔ این آئی اے کا کہنا ہے کہ شام اور عراق میں آئی ایس آئی ایس کی خلافت کا زوال شروع ہونے کے بعد محمد امین نے مارچ 2020 میں  نوجوانوں کو آئی ایس آئی ایس میں شمولیت کے لئے ہجرت پر ابھارنے اور فنڈ اکٹھا کرنے کے مقصد سے کشمیر کا دورہ کیا تھا اور اس کے لئے اس نے کشمیر کے محمد وقار لون اور اس کے ساتھیوں کا تعاون لیا تھا ۔ سازش کے مطابق وقار لون کو بینک اور ڈیجیٹل ذرائع سے فنڈ بھی ٹرانسفر کیا گیا تھا۔ اس طرح ہندوستان کے دیگر حصوں کے ساتھ یہ لوگ کشمیر، کرناٹکا اور کیرالہ میں اپنی سرگرمیوں کا جال بچھانے میں کامیاب ہوگئے تھے ۔