بینگلور کے جی ہلّی ، ڈی جے ہلّی فساد کے معاملے میں مینگلور کے قریب بنٹوال سے ایک شخص گرفتار
مینگلور 22/ ستمبر (ایس او نیوز) گزشتہ سال بنگلورو کے جی ہلّی اور ڈی جے ہلّی میں فسادات کے تعلق سے مینگلور سے قریب 36 کلو میٹر دور بنٹوال تعلقہ کے بولنتور کے رہنے والے محمد تبصیر نامی شخص کو پولیس نے گرفتار کر لیا ہے۔
ذرائع سے ملی اطلاع کے مطابق وٹلا پولیس نے تبصیر کے گھر پر صبح 3.30 بجے چھاپہ مارا اور اہم دستاویزات کے ساتھ گھر میں موجود افراد کے موبائل فون ضبط کرلئے ۔ پھر 11.30 بجے کے قریب اُسے گرفتار کرکےبنگلورو پولیس کے حوالہ کیا ۔
خیال رہے کہ گزشتہ سال ڈی جے ہلّی اور کے جے ہلّی میں ہوئے فساد اور ایم ایل اے اکھنڈا سرینواس مورتی کے گھر پر ہوئے ہنگامہ کے علاوہ پولیس اسٹیشن پر دھاوا بولنے کی کوشش کے معاملہ میں ریاستی پولیس تفتیش کر رہی ہے ۔ پولیس کا کہنا ہے کہ محمد تبصیر بنگلورو کے پرتشدد واقعہ میں ملوث ٹولہ کے ساتھ مسلسل رابطہ میں تھا ، اور اس نے پی ایف آئی میں اہم ذمہ داری سنبھال رکھی ہے ۔ پولیس کی چھاپہ ماری کے دوران سیکڑوں لوگ محمد تبصیر کے گھر کے سامنے جمع ہوگئے اور 'این آئی اے - گو بیک' کے نعرے لگانے لگے ۔ جب پولیس نے وضاحت کی کہ وہ لوگ این آئی اے سے تعلق نہیں رکھتے بلکہ بنٹوال پولیس کی ٹیم کا حصہ ہیں تو وہاں موجود بھیڑ نے اصرار کیا کہ انہیں اس چھاپہ ماری کا اصل سبب بتایا جائے ۔ جب پولیس نے سخت تیور اختیار کرتے ہوئے وارننگ دی تو بھیڑ منتشر ہوگئی ۔
معلوم ہوا ہے کہ تبصیر کے گھر میں اس کے بھائی کی شادی کی تیاریاں چل رہی ہیں اس دوران پولیس کے چھاپے اور تبصیر کی گرفتاری کی وجہ سے گھر کے افراد میں دکھ اور غم کی کیفیت پیدا ہوگئی ہے ۔
