ممبئی،24 /نومبر(آئی این ایس انڈیا)مہاراشٹر کی سیاست میں ہلچل اچانک تیز ہوگئی ہے۔ ایک ہی دن میں بی جے پی کے دو رہنماؤں کے بیانات سے قیاس آرائیاں بڑھ گئیں۔ مہاراشٹرا کے سابق وزیر اعلی اور اپوزیشن لیڈر دیویندر فڑنویس نے کہا ہے کہ بی جے پی کی اگلی حکومت کا تاج پوشی گزشتہ سال کی طرح دن نکلنے سے پہلے نہیں بلکہ صحیح وقت پر ہوگی۔

فڑنویس نے پیر کے روز میڈیا سے گفتگوکے دوران یہ بیان دیا جو منگل کو سامنے آیا۔ انہوں نے کہا کہ موجودہ مہاراشٹر وکاس آگاڑی حکومت سے عوام ناراض ہے۔ ان کی حکومت گرنے کے بعد ہم حکومت بنائیں گے۔

گزشتہ سال مہاراشٹر میں بی جے پی کی حکومت قائم ہونے کے ٹھیک ایک سال بعد فڑنویس کا بیان سامنے آیا ہے۔ 23 نومبر 2019 کو فڑنویس نے نیشنلسٹ کانگریس پارٹی (این سی پی) کے رہنما اجیت پوار کی حمایت سے حکومت تشکیل دی، حالانکہ ان کی حکومت صرف 80 گھنٹے چل سکی۔گزشتہ سال صبح کے وقت حکومت بنانے کا اعلان کرتے ہوئے فڑنویس نے حیران کردیا تھا،لہٰذا اس بار وہ کہہ رہے ہیں کہ وہ صحیح وقت پر حلف لیں گے۔

پیر کو فڑنویس کے بیان سے قبل مرکزی وزیر راؤصاحب دانوی پاٹل نے کہا تھا کہ بی جے پی اگلے 2 سے 3 ماہ میں مہاراشٹر میں حکومت بنائے گی۔ پارٹی نے اس کے لئے تیاریاں بھی کرلی ہیں۔ شیوسینا کے رہنما سنجے راوت نے کہا کہ ہماری حکومت باقی 4 سال مکمل کرے گی۔ اپوزیشن لیڈر مایوسی کی باتیں کر رہے ہیں، کیونکہ ان کی ساری کوششیں ناکام ہو گئیں ہیں۔ وہ بخوبی واقف ہیں کہ مہاراشٹر کی عوام حکومت کے ساتھ ہے۔ گزشتہ سال قائم ہونے والی 3 روزہ حکومت کی آج برسی ہے۔