بھٹکل 21/جولائی (ایس او نیوز) بھٹکل ساگر روڈ پر جمعہ کی شام کو ایک شخص کے خودکشی کرنے کی واردات پیش آنے کے بعد رات قریب دس بجے ایک اور خودکشی کی واردات بھٹکل تعلقہ کے بیلکے دیہات سے موصول ہوئی ہے۔

بیلکے میں ایک شادی شدہ  خاتون کی لاش اُسی کی والدہ کے مکان سے منسلک کنویں میں پائی گئی، جس کے بعد فائر بریگیڈ کی مدد سے لاش کو باہر نکالا گیا۔ خاتون کی شناخت وینا شیورام نائک (29) کی حیثیت سے کی گئی ہے۔

بتایا گیا ہے کہ وینا نائک کی شادی اسی سال فروری میں شرالی چتراپور کے ایک نوجوان سے ہوئی تھی، البتہ ذرائع نے خبر دی ہے کہ وہ اپنے شوہر سے خوش نہیں تھی۔ گھروالوں کے مطابق وینا نائک  پندرہ روزقبل ہی اپنی والدہ کے مکان بیلکے آئی تھی، آج جمعہ شب قریب نو بجے اُس نے اچانک مکان کے کمپائونڈ میں واقع کنویں میں کود کرخودکشی کرلی۔ 

چونکہ بھٹکل میں گذشتہ ایک ہفتے سے موسلادھار بارش کا سلسلہ جاری ہے، جس کے نتیجے میں کنویں میں پانی بھرا ہوا تھا۔ 

فائر بریگیڈ کی مدد سے لاش کو رات قریب دس بجے باہر نکالا گیا ۔ اطلاع ملتے ہی بھٹکل تحصیلدار وی این باڈکر پولس عملہ کے ساتھ موقع پر پہنچے اور حالات کا جائزہ لینے  کے بعدلاش کو سرکاری اسپتال لے جانے کا حکم دیا۔

ذرائع نے خبر دی ہے کہ وینا نائک بھٹکل کے ایک معروف پرائیویٹ اسپتال میں ملازمت کرتی تھی۔

بھٹکل مضافاتی پولس تھانہ میں معاملہ درج کیا گیا ہے، پولس مزید چھان بین کررہی ہے۔