نیوزی لینڈ کے خلاف پہلے ٹیسٹ میچ میں ہندوستان کو10 وکٹ سے شکست

Source: S.O. News Service | Published on 25th February 2020, 12:46 AM | اسپورٹس |

ویلنگٹن،24/فروری(ایس او نیوز/ایجنسی) دنیا کی نمبر ایک ٹسٹ ٹیم انڈیا کو اپنے بلے بازوں کی شرمناک کردگی کی وجہ سے نیوزی لینڈ کے خلاف پہلے کرکٹ ٹسٹ میچ کے چوتھے ہی دن پیر کو 10 وکٹ سے بدترین شکست کا سامنا کرنا پڑا۔ میزبان نیوزی لینڈ نے اپنی تاریخ کی 100 ویں ٹسٹ جیت درج کی اور دو میچوں کی سیریز میں 1-0 کی برتری حاصل کرلی۔

ہندوستان نے چار وکٹ پر 144 رنز سے اپنی اننگز کو آگے بڑھا یا لیکن اس کے بلے باز وکٹ پر ٹکنے کا کوئی جذبہ نہیں دکھا سکے اور اس کی دوسری اننگز محض 191 رنز پر سمٹ گئی۔ نیوزی لینڈ کو نو رن کا ہدف ملا جو اس نے 1.4 اوور میں بغیر کوئی وکٹ گنوائے حاصل کر لیا۔ نیوزی لینڈ کو اس جیت سے آئی سی سی ٹسٹ چمپئن شپ میں 60 پوائنٹس حاصل ہوئے جبکہ ہندوستان کو چمپئن شپ میں پہلی بار شکست کا سامنا کرنا پڑا۔

تیز گیند باز ٹم ساؤتھی نے 61 رن پر 5 وکٹ اور ٹرینٹ بولٹ نے 39 رن پر چار وکٹ لے کر ہندوستانی اننگز کو تہس نہس کر دیا۔ہندوستان نے چوتھے دن اپنے باقی چھ وکٹ صرف 47 رن جوڑ کر گنوا دئیے۔ میچ میں کل نو وکٹ لینے والے ساؤتھی کو پلیئر آف دی میچ کا ایوارڈ ملا۔

نیوزی لینڈ نے اس طرح ہندوستان کے خلاف تیسری بار ٹسٹ میچ میں 10 وکٹوں سے کامیابی حاصل کی۔ نیوزی لینڈ نے اس سے پہلے 1989/90 میں کرائسٹ چرچ میں اور 2002/03 میں ویلنگٹن میں ہندوستان کو 10 وکٹوں سے شکست دی تھی۔

ہندوستان نے چار وکٹ پر 144 رن سے آگے کھیلنا شروع کیا اور امید تھی کہ ناٹ آؤٹ بلے باز اور نائب کپتان اجنکیا رہانے اور هنوما وهاری کچھ جدوجہد کریں گے لیکن ٹاپ آرڈر کی طرح انہوں نے بھی مایوس کیا۔ رہانے نے 25 اور هنوما وهاری نے 15 رنز سے اپنی اننگز کو آگے بڑھایا۔ ہندوستان کے اسکور میں ابھی چار رن جوڑے ہی گئے تھے کہ بائیں ہاتھ کے تیز گیند باز بولٹ نے رہانے کو وکٹ کیپر واٹلنگ کے ہاتھوں کیچ کراکر ہندوستان کو پانچواں جھٹکا دیا۔

رہانے نے 75 گیندوں میں پانچ چوکوں کی مدد سے 29 رن بنائے۔ هنوما اپنے کل کے اسکور میں کوئی اضافہ نہیں کر سکے اور ساؤتھی کی گیند پر بولڈ ہو گئے۔ هنوما نے 79 گیندوں پر دو چوکوں کی مدد سے 15 رن بنائے۔ آف اسپنر روی چندرن اشون چار رنز بنا کر ساؤتھی کی گیند پر ایل بی ڈبلیو ہو گئے۔ ہندوستان نے 14 رنز کے وقفے میں تین وکٹ گنوا دئیے اور اس کا اسکور سات وکٹ پر 162 رن ہو گیا۔

وکٹ کیپر رشبھ پنت نے ایشانت شرما کے ساتھ آٹھویں وکٹ کے لئے 26 رن جوڑے لیکن اس کے بعد تین رن کے اندر ہندوستان کے باقی تین وکٹ بھی نکل گئے اور ہندوستان کی اننگز 191 رنز پر سمٹ گئی۔ کولن ڈی گرینڈ ہوم نے ایشانت کو ایل بی ڈبلیو کیا جبکہ ساؤتھی نے اننگز کے 81 ویں اوور میں رشبھ پنت اور جسپريت بمراه کا وکٹ نکال کر ہندوستان کو شرمناک شکست کی جانب دھکیل دیا۔پنت نے 41 گیندوں میں چار چوکوں کی مدد سے 25 رنز اور ایشانت نے 21 گیندوں میں دو چوکوں کے سہارے 12 رن بنائے۔ ساؤتھی نے 21 اوور میں 61 رن پر پانچ ، بولٹ نے 22 اوور میں 39 رن پر چار اور گرینڈ ہوم نے 16 اوور میں 28 رن پر ایک وکٹ لیا۔

نیوزی لینڈ کو جیت کے لئے محض 9 رنوں کا ہدف ملا ، جو انہوں نے بغیر کوئی وکٹ کھوئے 14 اوور وں میں حاصل کرلیا۔ ٹام لاتھم سات اور ٹام بلینڈیل نے ناٹ آؤٹ دو رن بنائے۔ ایشانت اور بمراہ نے ایک ایک اوور پھینکا لیکن وکٹیں لینے میں ناکام رہے۔ نیوزی لینڈ نے اس طرح اپنے ٹیسٹ تاریخ کی 100 ویں جیت 41 ویں ٹیسٹ میں جاکر حاصل کر لی۔ نیوزی لینڈ ٹیسٹ میں 1ٍ00 ویں فتح حاصل کرنے والا ساتواں ملک بن گیا ہے۔ نیوزی لینڈ نے ہندوستان سے ٹی -20 سیریز 5۔0 سے ہارنے کے بعد شاندار واپسی کی اور ون ڈے سیریز0۔3 سے کلین سویپ کرنے کے بعد پہلا ٹیسٹ 10 وکٹ سے جیت لیا۔

ایک نظر اس پر بھی

بھٹکل: انفا کے نثار نے بنائی 27 گیندوں پر دھواں دار سنچری؛ قائم کیا ٹی ٹوئنٹی میں بھٹکل تعلقہ میں تیز رفتار سنچری اسکور کرنے کا نیا ریکارڈ

بھٹکل آزاد نگر کی انفا کرکٹ ٹیم کے کھلاڑی ناصر احمد المعروف احمدی نے بھٹکل تعلقہ لیول ٹی ٹوینٹی کرکٹ ٹورنامنٹ میں  محض 27 گیندوں پر سینچری اسکورکرکے تیز رفتار سنیچری اسکور کرنے  کا  نیا ریکارڈ قائم  کیا ہے۔ اس سے قبل قریب دس بارہ سال پہلے  لبیک نوائط کے فرحان جوشیدی نے ایک ...

ہندوستان نے برسبین میں سیریزجیت کر تاریخ رقم کی

نوجوان سلامی بلے باز شبمن گل (91)، چیتیشور پجارا (56) اور باصلاحیت وکٹ کیپر بلے باز رشبھ پنت (ناٹ آؤٹ) کی بہترین بلے بازی کی بدولت ہندوستان نے آسٹریلیا کو برسبن کے گابا میدان میں منگل کے روز کھیلے گئے چوتھے اور آخری کرکٹ ٹیسٹ میچ کے پانچویں دن تین وکٹوں سے شکست دے کر نئی تاریخ ...

سورو گنگولی کی حالت مستحکم ، گورنر اور سی ایم ممتا بنرجی سمیت متعددلیڈران پہونچے

بی سی سی آئی کے صدر سورو گنگولی کی صحت اب مستحکم ہے۔ مغربی بنگال کے گورنر جگدیپ دھنکھڑ اوروزیراعلیٰ ممتا بنرجی سمیت متعدد وزراء اورٹی ایم سی اوربی جے پی کے لیڈران ان کی حالت جاننے کے لیے اسپتال پہنچے۔

آسٹریلیا کو 100 ویں ٹیسٹ میچ میں شکست دے کر ہندستان نے کی برابری

ہندوستان نے اپنے گیند بازوں کی مضبوط کارکردگی کا مظاہرہ کرتے ہوئے دوسرے باکسنگ ڈے ٹیسٹ کے چوتھے روز آسٹریلیا کو آٹھ وکٹوں سے شکست دے کر چار میچوں کی سیریز 1-1 سے برابر کرلی۔ ہندوستان نے آسٹریلیا کو دوسری اننگز میں 200 رنوں پر سمیٹ دیا اور فتح کے لئے ملا 70 رنوں کا ہدف دو وکٹیں گنوا ...

بھٹکل کرکٹ لیگ ٹورنامنٹ کی افتتاحی تقریب : ڈویزن لیول میں کھیلنے کا موقع

19دسمبر 2020بروز سنیچر سے بھٹکل اسپورٹس اکیڈمی بھٹکل اور بھٹکل مسلم یوتھ فیڈریشن کے اشتراک سے  شروع ہونے والے امین سیف اللہ جونئیر کرکٹ لیگ کی افتتاحی تقریب 18دسمبر بروز جمعہ کی شام  تعلقہ اسٹیڈیم (وائی ایم ایس اے گراؤنڈ) میں منعقد ہوئی۔

سری لنکا کرکٹ بورڈ منسوخ کرسکتا ہے جنوبی افریقہ کا دورہ

حال ہی میں میزبان جنوبی افریقہ اور انگلینڈ کے مابین تین میچوں کی ٹی ٹونٹی سیریز اور تین میچوں کی ون ڈے سیریز کھیلی جانی تھی۔ انگلینڈ کی ٹیم جو جنوبی افریقہ کے دورے پر گئی تھی انہوں نے تین میچوں کی ٹی ٹونٹی سیریز کھیلی، لیکن ون ڈے سیریز سے قبل جنوبی افریقہ کرکٹ بورڈ کورونا وائرس ...