منگلورو،یکم ستمبر (ایس ا و نیوز) وزارت شہری ہوابازی(ایم او سی اے) ، وزارت صحت و بہبودیٔ خاندان(ایم او ایچ ڈبلیو) اور حکومت کرناٹکا نے بیرون ممالک سے منگلورو آنے والے بین الاقوامی مسافروں کے لئے نئی گائڈ لائنس جاری کی ہیں

نئی ہدایات کے مطابق منگلورو شہر میں داخل ہونے والے انٹرنیشنل پاسنجرس کے لئے ہوائی جہاز میں سوار ہونے  کے لئے ایئر پورٹ پر آنے سے پہلے ہی از خود رپورٹنگ کرنے کے لئے  ویب سائٹ www.newdelhiairport.in/airsuvidha/APHO-registration    پر فارم بھرنا لازمی ہوگا ۔مذکورہ محکمہ جات کی طرف سےیہ بھی  ہدایت دی گئی ہے کہ تمام مسافر وں کے لئے  اپنے اسمارٹ فون پر ’آروگیہ سیتو، کوارنٹین  واچ اور آپتامترا‘ نامی تینوں ایپ ڈاؤن لوڈ کرلینا ضروری ہوگا۔

اس کے علاوہ پہلے سے جو ہدایات دی گئی تھیں وہ بھی برقرار رہیں گی جس کے تحت مسافر کے پاس ہندوستان میں ایکٹیو رہنے والا سِم کارڈ ہونا چاہیے۔اگر مسافر کے پاس ہندوستانی کارڈ نہیں ہے تو اس کے گھروالوں کو مسافر کے منگلورو میں لینڈ ہونے سے پہلے  ہی اس کا انتظام کرناچاہیے۔ یہ بھی بتایا گیا ہے کہ مسافر کے لئے ایئر پورٹ پر بھی مقامی کارڈ خریدنے کی سہولت دستیاب رہے گی۔