ریاست میں کووڈ-19کی دوسری لہر کو روکنے کے لئےکل سے چھٹی سے نویں تک کی کلاسس بندکرنے کی ہدایت؛ حکومت کی طرف سے جاری کئے گئے نئے رہنما خطوط
بنگلورو:2؍ اپریل(ایس اؤ نیوز) ریاست میں کورونا کی دوسری لہر کو روکنے کےلئے ریاستی حکومت نے نئے رہنماخطوط جاری کئے ہیں۔ جس میں کہاگیا ہےکہ ایک مہینےکی مدت میں کووڈ-19کے نئے معاملات کی تعداد میں مسلسل اضافہ ہورہاہے۔ ماہرین کی صلاح کے مطابق پیشگی احتیاط کے طورپر اقدامات اٹھائے جارہے ہیں۔ حکومت نے نئے شرائط پر سختی سے عمل کرنےکی عوام سے اپیل کی ہے۔ حکومت کی طرف سے جاری کئے گئے نئے رہنما خطوط اور شرائط کچھ اس طرح ہیں۔
* چھٹی سے نویں تک ودیاگما سمیت ہر طرح کی پڑھائی بند کی جائے۔ 10،11،12کےکلاسس حسب معمول جاری رکھیں۔ البتہ کسی بھی متعلم کو کلاس میں حاضری دینا لازمی نہیں ہے۔
*اعلیٰ تعلیم اور پیشہ ورانہ کورسس کے کلاسس کے امتحانات اور میڈیکل تعلیم کے کلاسس جاری رہیں گے۔ دیگر سبھی طرح کے کلاسس بند رکھے جائیں گے۔
*مذہبی عبادت گاہوں میں انفرادی طورپر عبادت کے لئے موقع رہے گا۔ لیکن جہاں بھی گروہ کی شکل ہوگی اس پر ممانیت ہوگی۔
*سبھی قسم کے جم، پارٹی ہال ، کلب ہاؤس ، سوئمنگ پول بند رہیں گے۔
*کسی طرح کی کوئی ریلی ، احتجاج، دھرنا وغیرہ پر پابندی رہے گی۔
*عوامی سواریوں میں متعینہ تعداد اور نشان کردہ نشستوں کے نظام کی خلاف ورزی نہ کریں۔
*دفاتر اور دیگر جہاں کام کاج ہوتاہے ممکنہ حد تک گھروں سے ہی کام کیاجائے ۔ ورک فرام ہوم کو اپنایا جائے۔
*بنگلورو شہر اور بنگلورو دیہی ، میسور، کلبرگی ، دکشن کنڑا، اُڈپی، بیدر اور دھارواڑ اضلاع کی سینما تھیڑوں میں صرف 50فی صد ناظرین کو موقع دیاجائےگا۔