کیا بھٹکل میں پھر کورونا پوزیٹو کا معاملہ سامنے آیا ؟ کہاں سے آیا تھا یہ نوجوان ؟
بھٹکل 17/مئی (ایس او نیوز) بھٹکل میں پھر ایک شخص کی رپورٹ کورونا پوزیٹو آنے کی خبر موصول ہوئی ہے، البتہ اس خبر میں سچائی ہے یا نہیں اس کی تصدیق کے لئے کل دوپہر تک سرکاری سطح پر آنے والی کورونا نیوز بلٹین کا انتطار کرنے پڑے گا۔
ذرائع کی مانیں تو 27 سالہ نوجوان 14مئی کو اپنی ماں اور بہن کے ساتھ کار پر سوارممبئی سے بھٹکل کے لئے آیا تھا لیکن بھٹکل چونکہ کنٹینمنٹ زون میں ہے، اسے بھٹکل میں داخل ہونے سے پہلے ہی مرڈیشور کے ایک ہوٹل میں کورنٹائن میں رکھا گیا تھا۔ ذرائع نے بتایا کہ ان تینوں کے تھوک کے سیمپل اُسی دن جانچ کے لئے روانہ کئے گئے تھے، جس میں نوجوان کی رپورٹ آج اتوار دیر شام کو موصول ہوئی ہےجو کورونا پوزیٹو ہے۔ البتہ اس کی سرکاری طور پر تصدیق ہونی باقی ہے۔
ذرائع سے ملی اطلاع کے مطابق اس نوجوان کا تعلق بھٹکل کے ایک پرانے محلہ سے ہے۔ سننے میں آیا ہے کہ نوجوان کی رپورٹ پوزیٹو آنے کی اطلاع ملتے ہی نوجوان کو فوری طور پر بھٹکل تعلقہ سرکاری اسپتال میں منتقل کیا گیا ہے۔ چونکہ ممبئی سے آتے ہی ان تینوں کا کورنٹائن کیا گیا تھا، اس بنا پراس کے رابطے میں بھٹکل کے کوئی لوگ ہونے کے امکانات نظر نہیں آرہے ہیں، البتہ مزید جانکاری جٹائی جارہی ہے۔
