اڈپی،30؍ستمبر (ایس او نیوز) منشیات مخالف مہم کے سلسلے میں چل رہی کارروائی کے دوران نارکوٹکس کنٹرول بیورو نے اڈپی میں طلباء کو’ ڈارک نیٹ ‘کے توسط سے نشہ آور ایم ڈی ایم اے گولیاں آن لائن فروخت کرنے کے الزام میں 4 افراد کو گرفتار کرلیا ہے۔

این سی بی کی طرف سے جاری پریس نوٹ کے مطابق گرفتار کیے گئے ملزمین کے نام کے پرمود ، فہیم ، اے حشیر اور ایس ایس شیٹی ہیں۔ اس ریکیٹ میں فہیم اصل ماسٹر مائنڈ ہے اور ایس ایس شیٹی منشیات کے پارسل وصول کرنے والا ہے، جبکہ بقیہ دو افراد اس گینگ کے ساتھی ہیں۔این سی بی کا کہنا ہے کہ ’’فہیم نے بِٹن کوائن (کرپٹو کرنسی) کے ذریعے منشیات خریدنے کا طریقہ ڈارک نیٹ  پر موجود ایک ویب سائٹ سے سیکھا۔آن لائن خریداری کے بعدوہ ہندوستان کے مختلف شہروں کے پتوں پر منشیات کے پارسل روانہ کرتاتھا اور پھر وہاں سے یہ پارسل وصول کرلیتا تھا۔اس کے بعد وہ ان منشیات کواڈپی کے مختلف کالجوں میں زیر تعلیم طلبہ کے ہاتھوں فروخت کیاکرتا تھا۔‘‘این سی بی نے مزید کہا ہے کہ ’’فہیم نے منشیات کو ڈارک نیٹ کے ذریعے  نیدرلینڈ سےخریدنے میں بڑی مہارت حاصل کر لی ہے۔ ان کا ایک پارسل جولائی 2020 میں ضبط کیا گیا تھا، لیکن پارسل وصول کرنے والے کا درست پتہ نہ ہونے کی  وجہ سے این سی بی کو ٹیکنیکل  ڈاٹا حاصل کرنا پڑا اور اس کے بعد منشیات کے اس سنڈیکیٹ کی نشاندہی کر لی گئی۔‘‘

اس منشیات ریکیٹ کے طریقہ کار کے بارے میں این سی بی نے بتایا کہ ’’نیدر لینڈ کے ایک پوسٹ آفس سے آرڈرکیا گیا ایک لفافہ این سی بی کے ہاتھ لگا تھا جس کے اندر ایم ڈی ایم اے کی  750 گولیاں موجود تھیں۔ یہ ممنوعہ منشّی گولیاں نیدر لینڈ سے  کوریئر پارسل کےذریعے منگوائی گئی تھیں اور رقم  کی ادائیگی بِٹ کوائن کےذریعے کی گئی تھی۔این سی بی نے ڈیجیٹل انالیسس کے ذریعے منشیات کے اس سنڈیکیٹ پر شکنجہ کسنے میں کامیابی حاصل کی ہے۔‘‘این سی بی کے ذرائع نے بتایا کہ اس ریکیٹ میں مزید افراد کے ملوث ہونے کے تعلق سے تحقیقات جاری ہے۔