دبئی کے قریب عجمان میں شروع ہورہا ہے نوائط پرئمیر لیگ کا شاندار کرکٹ ٹورنامنٹ؛ پہلے نام درج کرنے والی چھ ٹیموں کو ملے گا ٹورنامنٹ میں موقع
دبئی 21/اکتوبر(ایس او نیوز) متحدہ عرب امارات کے شہر عجمان میں جنوری 2019 کو نوائط پرئمیر لیگ (این پی ایل) کاشاندار کرکٹ ٹورنامنٹ منعقد کیا جارہا ہے ، جس میں دبئی یا متحدہ عرب امارات کے شہروں میں مقیم بھٹکل، شرالی، مرڈیشور اور منکی کے کھلاڑی اپنے جوہر دکھلا سکیں گے۔ اس بات کی اطلاع این پی ایل کے کنوینر شفاعت شاہ بندری نے دی ہے۔
پریس ریلیز جاری کرتے ہوئے شفاعت شاہ بندری نے بتایا کہ اس پہلے ٹورنامنٹ میں پہلے نام درج کرنے والی چھ ٹیموں کو شریک ہونے کا موقع دیا جائے گا۔ ٹی ٹوینٹی کا یہ نیا ٹورنامنٹ عجمان کے ایڈن گارڈن کرکٹ گرائونڈ میں کھیلا جائے گا اور ڈے اینڈ نائٹ میچس ہوں گے۔
عرب امارات کی مختلف کمپنیوں میں برسر روزگار بھٹکل اور اطراف کے کئی کھلاڑیوں کے ڈیمانڈس کو دیکھتے ہوئے اس ٹورنامنٹ کا انعقاد کیا گیا ہے جس میں کھلاڑیوں کو اپنی خداداد صلاحیتوں کے مظاہرے کا بھرپور موقع ملے گا۔ توقع ہے کہ سینکڑوں کی تعداد میں شائقین کرکٹ بھی اس ٹورنامنٹ کے میچس سے لطف اندوز ہوں گے۔
ٹورنامنٹ کا پہلا میچ اگلے سال 4 جنوری کو جبکہ فائنل مقابلہ 25 جنوری کو کھیلا جائے گا۔
ہر ٹیم میں 16 کھلاڑی ہوں گے جس میں 14 کھلاڑیوں کا انتخاب اوکشن کے ذریعے ہوگا، البتہ ہر ٹیم کو آوکشن سے قبل ائیکون پلئیر کا انتخاب کرنے کے ساتھ ساتھ ٹیم کے مالک کو مزید ایک کھلاڑی کو اوکشن سے پہلے منتخب کرنے کا اختیار ہو گا۔
انہوں نے بتایا کہ چار ہفتوں تک جاری اس ٹورنامنٹ کے لئے کھلاڑیوں کا رجسٹریشن، کھلاڑیوں کے اوکشن کی تاریخ اور مزید تفصیلات جلد ہی فراہم کی جائیں گی۔ اس تعلق سے مزید معلومات کے لئے شفاعت شاہ بندری سے راست رابطہ بھی کیا جاسکتا ہے۔
