پیادہ اپنی اوقات بھول جائے توکچلا جاتا ہے: نوجوت سنگھ سدھو
نئی دہلی،15/ مئی (ایس او نیوز/آئی این ایس انڈیا) آخری دور کے انتخابی مہم میں تمام پارٹیوں نے اپنی پوری طاقت جھونک دی ہے لیکن تشہیرکے اس آخری پڑاؤ میں پنجاب میں کانگریس کو بڑا جھٹکا لگا ہے۔کانگریس کے اسٹار پرچارک نوجوت سنگھ سدھو نے گلے میں خرابی کی شکایت کرتے ہوئے تشہیری مہم سے دوری اختیار کرلی ہے۔ باقی ریاستوں میں پارٹی کا اعلان کرنے کے بعد سدھو کل پنجاب میں راہل گاندھی کی ریلی سے دور رہے۔بتایا جا رہا ہے کہ وزیراعلیٰ کیپٹن امرندر سنگھ سے ان کی ناراضگی اس کے پیچھے سب سے بڑی وجہ ہے۔پنجاب کی کانگریس انچارج آشاکماری نے عوامی طور پر یہ کہہ کر سدھو کی ناراضگی کو بڑھا دیا ہے کہ پنجاب میں تشہیرکے لئے سدھو کی ضرورت نہیں ہے۔حال ہی میں سدھو نے اشاروں میں اپنی ناراضگی ظاہر کرتے ہوئے کہا تھا کہ بغیر بلائے میں دربار صاحب اور ماتا رانی کے دربار کے علاوہ کہیں نہیں جاتا۔ایسے میں مانا جا رہا ہے کہ گلے میں خرابی محض ایک بہانہ ہے، بلکہ سدھو کے انتخابی مہم سے دوری کی اصلی وجہ تو ان کی ناراضگی ہے۔اسی سلسلے میں نوجوت سنگھ سدھو نے کہاکہ میں پرینکا جی کے ساتھ پنجاب جا رہا ہوں جو پرینکا، راہل جی اور اعلی کمان کہتا ہے میں وہی کرتا ہوں۔جو احمد پٹیل جی کے یہاں سے پروگرام بنتا ہے ویسا کرتا ہوں۔ساتھ انہوں نے یہ بھی کہاکہ شطرنج کی بساط بچھی ہو اور پیادہ اپنی اوقات بھول جائے تو کچلا جاتا ہے لہذا جو حکم ہوتا ہے وہ میں کر دیتا ہوں۔نوجوت سنگھ سدھو نے کہا ہے کہ وہ کیپٹن سے ناراض نہیں ہیں۔کیوں ناراض ہوں گا؟ کوئی ٹی آر پی کے لئے ناراض کر دے تو الگ بات ہے۔ کیپٹن صاحب نے کہا ہے 13 سیٹیں جیتیں گے پنجاب میں متحد طاقت جیت کا سبب بنتی ہے۔منتشر طاقتیں زوال کا سبب بنتی ہیں۔ہمارا مقصد ایک ہی ہے راہل جی کو وزیر اعظم بنانے کا۔