نوی ممبئی ، 31/اکتوبر (ایس او  نیوز /ایجنسی) نوی ممبئی کے اُلوے میں بدھ کی شام تین گیس سلنڈروں میں دھماکے کے باعث ایک جنرل اسٹور اور ایک رہائشی گھر میں شدید آگ بھڑک اُٹھی۔ اس آتشزدگی کے نتیجے میں ایک ہی خاندان کے تین افراد ہلاک ہوگئے، جن میں دو بچے بھی شامل ہیں، جبکہ ایک شخص زخمی ہوا ہے۔ پولیس کے مطابق، مرنے والوں میں دکاندار رمیش کی اہلیہ منجو اور ان کے دو بچے شامل ہیں۔ دکاندار رمیش کو شدید زخمی حالت میں اپولو اسپتال میں منتقل کیا گیا ہے، جہاں ان کا علاج جاری ہے۔

اضافی پولیس کمشنر (ایس پی) نوی ممبئی نے واقعہ کے بارے میں اطلاع دیتے ہوئے بتایا کہ ہمیں 30 اکتوبر کو تقریباً 8 بجے اطلاع ملی کہ ایک شخص کی رہائش اور کِرانہ اسٹور میں آگ لگ گئی ہے، اس کے بعد پولیس اور فائربریگیڈ دستہ نے جائے وقوع پر پہنچ کر حالات کا جائزہ لیا۔ پولیس کی ابتدائی جانچ میں پتہ چلا ہے کہ کرانہ اسٹور میں تین گیس سلنڈروں کے پھٹ جانے سے دکان اور رہائش میں آگ لگ گئی جس کی زد میں آکر دو بچوں سمیت تین لوگوں کی موت ہو گئی۔

چیف فائر بریگیڈ افسر وجئے رانے نے بھی واقعہ کے سلسلے جانکاری دی ہے۔ انہوں نے کہا کہ "ہم اپنی ٹیم کے ساتھ موقع پر پہنچے اور آگ پر قابو پا لیا۔ زخمی شخص کو مقامی لوگوں نے اسپتال میں داخل کرایا ہے۔ ٹیم کے ذریعہ 2 فائر ٹینڈر کی مدد سے آگ پر قابو پایا گیا۔ پہلی نظر میں ایسا لگ رہا ہے کہ گیس سلنڈر میں دھماکہ کی وجہ سے آگ لگی، لیکن ابھی تک اس کا واضح طور پر پتہ نہیں چل سکا ہے۔ فی الحال یہ معلوم کرنے کی کوشش کی جا رہی ہے کہ گھر اور جنرل اسٹور میں آگ کیسے لگی؟"