بھٹکل 25 ستمبر (ایس او نیوز) نوید حسن ائیکری بھٹکل کمیونٹی جدہ کے نئے جنرل سکریٹری اور عبدالمعیز جوکاکو نئے سکریٹری منتخب ہوگئے ہیں، اس بات کی اطلاع بھٹکل کمیونٹی جدہ کے صدر جناب عبدالسلام دامدا ابو نے دی ہے۔
عبدالسلام صاحب نے بتایا کہ جماعت کے جنرل سکریٹری حبیب اللہ محتشم صاحب جدہ سے ریاض منتقل ہورہے ہیں، جس کو دیکھتے ہوئے سکریٹری کی حیثیت سے خدمات انجام دینے والے نویدحسن ائیکری کو جنرل سکریٹری کے عہدہ پر منتخب کیا گیا ہے، جبکہ نوید کی جگہ پر اب عبدالمعیز جوکاکو صاحب سکریٹری کی خدمات انجام دیں گے۔
جناب حبیب اللہ محتشم گذشتہ12/13 سالوں سے جدہ جماعت کے رکن انتظامیہ رہے ہیں، جس میں آٹھ سالوں تک وہ سکریٹری کے عہدہ پر رہ کر خدمات انجام دی۔ گذشتہ میعاد کے پورے دو سال اورجاری میعاد میں ایک سال تک یعنی تین سال تک وہ بھٹکل کمیونٹی جدہ کے جنرل سکریٹری کے عہدہ پر فائز رہے اور اپنی ذمہ داریوں کو بخوبی نبھایا۔ موصوف جماعت کے سرگرم اراکین میں سے ہیں جو ہر سماجی کام میں بڑھ چڑھ کر حصہ لیتے ہیں اور عوامی خدمت کے لئے ہمیشہ تیار رہتے ہیں۔
جناب عبدالسلام نے بتایا کہ کمپنی نے حبیب اللہ محتشم کو جدہ سے ریاض شہر میں منتقل کیا ہے جس کو دیکھتے ہوئے حبیب اللہ صاحب نے جماعت کو اپنا استعفیٰ پیش کیا تھا، جسے آج کی انتظامیہ میٹنگ میں قبول کیا گیا اور ان کی جگہ پر نئے جنرل سکریٹری اور سکریٹری کا انتخاب عمل میں آیا۔اسی طرح حبیب اللہ صاحب کی خالی نشست پر جماعت کی انتظامیہ میں فیضان شاہ بندری کو لیا گیا ہے۔
جماعت کے اراکین نے نوید ائیکری کو جنرل سکریٹری منتخب ہونے اور عبدالمعیز کو سکریٹری منتخب ہونے پر مبارکباد پیش کی ہے اسی طرح نئے رکن انتظامیہ منتخب ہونے والے فیضان شاہ بندری کا استقبال کیا ہے۔